ملير ڪورٽ ۾ جانورن تي غيرقانوني ٽيڪس وصولي خلاف عدالت ۾ درخواست

ٽي ايم سي ابراهيم حيدري ٺيڪو قاعدن تحت جاري ناهي ڪيو: وڪيل

ملير (رپورٽ: عبدالرشيد مورجھريو) کير ڏيندڙ جانورن تي ٽيڪس چنگي جو غيرقانوني ٺيڪو ختم ڪرائڻ لاءِ ملير ڪورٽ ۾ ايڊووڪيٽ شاه زمان جوڻيجو درخواست داخل ڪئي آهي جنھن ۾ هن مؤقف اختيار ڪيو آهي ته ٽي ايم سي ابراهيم حيدري پاران ٺيڪو سنڌ پبلڪ پروڪيورمينٽ ريگيوليٽري اٿارٽي جي قاعدن تحت جاري نه ڪيو ويو، 24 ڪروڙ رپين جي ٺيڪي لاءِ بولي 12.5 ڪروڙ مقرر ڪري 14 ڪروڙ رپين ۾ نيلام ڪيو ويو۔درخواست ۾ چيو ويو آهي ته ماضي ۾ به ساڳئي ٺيڪي ۾ مبينه ڪرپشن تي اينٽي ڪرپشن سنڌ ايف آءِ آر داخل ڪئي هئي، جڏهن ته نيب جي انڪوائري به رڪارڊ تي موجود آهي۔ انڪوائري ۾ ثابت ٿيو ته جانورن تي ٽيڪس وصولي ۽ ٺيڪو ڏيڻ جو اختيار قانوني طور ڪراچي ميٽروپوليٽن ڪارپوريشن وٽ آهي۔مزید چيو ويو ته 2024 ۾ سنڌ حڪومت جي جاري ڪيل گزٽ نوٽيفڪيشن موجب هي ٺيڪو ڪي ايم سي جي دائري اختيار ۾ اچي ٿو ۽ ٽيڪس جو ريٽ به مقرر ڪيو ويو آهي، پر ٺيڪيدار وٽ ٽيڪس ريٽ جي تعين جو ڪو به قانوني ثبوت موجود ناهي۔درخواست گذار عدالت کان استدعا ڪئي ته ٽي ايم سي ابراهيم حيدري جو ٺيڪو غيرقانوني قرار ڏئي ختم ڪيو وڃي ۽ غيرقانوني ٽيڪس وصولي بند ڪرائي وڃي۔