قومي عوامي تحريڪ جي سڏ تي 17هين ڏينهن به مختلف شهرن ۾ ريليون ۽ مظاهرا

حيدرآباد، ٻڍو قمبراڻي ۽ ڪلوئي سميت مختلف شهرن ۾ سنڌ دشمن منصوبن خلاف احتجاج ڪيو ويو

حيدرآباد/ ٻڍو قمبراڻي /ڪلوئي: پاڻي تي ڌاڙي، ڪارپوريٽ فارمن، ڪرپشن، ڏوھن ۽ ميرٽ جي لتاڙ خلاف قومي عوامي تحريڪ جي مرڪزي سڏ تي 17ھين ڏينھن بہ سنڌ جي مختلف شهرن ۾ احتجاجي مظاهرا ڪيا ويا. ان سلسلي ۾ حيدرآباد جي علائقي قاسم آباد ۾ ڳوٺ سنجر ملاح کان ريلي ڪڍي واڌو واھ چوڪ وٽ مظاھرو ڪيو ويو. احتجاج جي اڳواڻي نذير بليدي، بابو ميمڻ، معشوق چانڊيو ۽ ٻين ڪئي. ھوڏانھن بدين جي شھر ٻڍو قمبراڻي ۾ قومي عوامي تحريڪ جي ضلعي صدر بچل احمداڻي، لکي ميرجت ۽ ٻين جي اڳواڻي ۾ مظاھرو ڪيو ويو. ٻئي طرف ڪلوئي ۾ ضلعي صدر زاھد گل اوٺو، محمد نھڙي، پرشوتم پرمار ۽ ٻين جي اڳواڻي ۾ مظاھرو ڪيو ويو. ان موقعي ۾ اڳواڻن چيو تہ مسلسل خراب حڪمراني سنڌ جي تعليم، صحت، امن تباھ ڪيو آھي. نااھل حڪمران مسئلا پيدا ڪري رھيا آھن. پ پ حڪمران 18 سالن ۾ ڪو به ماڊل ضلعو ته ڇا تعلقو به ٺاھي نہ سگھيا آھن. درياھ، زمينون ۽ وسيلا وڪڻي اقتدار خريد ڪندڙ حڪمران سنڌ جا سڄڻ ناھن. اٽي، لٽي ۽ اجھي جو نعرو ھڻي غريب عوام سان دوکو ڪيو ويو آھي. اڳواڻن چيو تہ ڪرپٽ حڪمرانن کي درياھ ۽ زمينون وڪڻڻ نه ڏينداسين، ساھ جي آخري ھڏڪي تائين جدوجھد جاري رکنداسين. ملڪ جون معاشي پاليسيون عوام دوست ناھن. ھاري، مزدور ۽ پورھيت غربت جي لڪير کان ھيٺ زندگي گذاري رھيا آھن. مھانگائي غريب عوام جو جيئڻ جنجال ڪري ڇڏيو آھي. سنڌ قدرتي دولت سان مالا مال آھي پر حڪمرانن جي ڦرلٽ سبب ھرطرف غربت ۽ بدحالي آھي. اڳواڻن چيو تہ سنڌ جا ماڻھو نفرت ۽ تعصب جي سياست کي رد ڪن ٿا. اردو ڳالھائيندڙن سميت جن جو جيئڻ مرڻ ھتي آھي اھي اسان جا ڀائر ۽ سنڌ جو حصو آھن. قومي مسئلن تان ڌيان هٽائڻ لاء نفرت جون ڳالھيون ڪيون پيون وڃن. حڪمران ڪيتريون بہ سازشون ڪن پر درياھ ۽ زمينن جي جدوجھد کي خاموش ٿيڻ نہ ڏينداسين. اڳواڻن چيو تہ درياھ جياپي جو ذريعو آھي، درياھ ھليو ويو تہ غلامن واري زندگي گذارينداسين. ڪارپوريٽ فارمنگ سنڌ دشمن منصوبو آھي، جنھن ذريعي ننڍيون ننڍيون رياستون ٺاھيون وينديون، اتي قانون الڳ ھوندو. سنڌي ماڻھن لاءِ نو گو ايريا بنايا ويندا. پنھنجي ئي وطن ۾ بي وطن ڪيو ويندو. اڳواڻن چيو تہ پ پ حڪمران اقتدار لاء ھر ڪريل سوديبازي ڪري سگھن ٿا. سنڌ سان دشمني ملڪ سان دشمني آھي. ڌاڙيل ڪئنال ٺاھي درياھ تي ڌاڙا بند ڪيا وڃن. اڳواڻن چيو تہ پنجاب سڄو سال سنڌو درياھ تي ڌاڙا ھڻي پاڻي چوري ڪري ٿو. ارسا ۽ واپڊا پاڻي چوري ۾ پنجاب جا سھولتڪار آھن. سنڌ کي پنھنجي حصي جو پاڻي ملي ھا تہ لکين ايڪڙ زمين غير آباد نه ٿئي ھا. زراعت کي تباھ ڪري سنڌ جو معاشي قتل ڪيو ويو آھي. اڳواڻن چيو ته ھٿ وٺي ميرٽ کي ختم ڪيو ويو آھي. سنڌ ۾ طبقاتي تعليمي نظام آھي. پورھيت طبقي لاءِ سرڪاري اسڪول آھن ۽ حڪمران، جاگيرداري طبقي لاءِ پرائيويٽ تعليمي نظام آھي. جن وٽ پئسا آھن آھي تعليم ۽ ڊگريون خريد ڪن ٿا. پبلڪ سروس ڪميشن ڪرپشن جو اڏو بڻجي ويو آھي. لکين روپين کان ڪروڙين روپين تائين وڪرو ٿين ٿيون. غريب ذھين نوجوانن کي ھٿ وٺي فيل ڪيو وڃي. پيپلز پارٽي نوجوانن جي اميدن کي قتل ڪيو آھي. اڳواڻن چيو تہ 6 نوان ڪئنال ٺھيا ته سنڌ بيابان بنجي ويندي. وفاق ۽ سنڌ جي حڪمرانن جي ايجنڊا تي عوام جي ترقي ناھي. ڌاڙيل راڄ قائم آھي. بدامني آھي. آئين ۽ قانون نالي ڪا شئي ناھي. اڳواڻن چيو تہ انسان دشمن سرداري، جاگيرداري ۽ وڏيرا شاھي جو نظام عوام کي غلام بڻائي رکيو آھي. اڳواڻن چيو تہ سکر، لاڙڪاڻو ڊويزن جا ضلعا ڌاڙيلن جي حوالي ڪيا ويا آھن. سڄي سنڌ بدامني جو شڪار آھي. سمورا شھر آئيس، چرس، ٺري ۽ ٻي منشيات جو اڏو بنايا ويا آھن. ڀنگ لاءِ ماڻھو اغوا ۽ قتل ڪيا وڃن ٿا. اڳواڻن چيو تہ حڪمران ھوش کان ڪم وٺن. سنڌ دشمن 6 ڪئنال ۽ ڪارپوريٽ فارمنگ منصوبن کي رد ڪيو وڃي. سنڌو درياھ تي ڌاڙا ھڻي سنڌ کي ريگستان بنائڻ ملڪ دشمني آھي، ملڪ خلاف سازشون بند ڪيون وڃن. ڌاڙيلن، ڏوھارين ۽ منشيات فروشن ۽ انھن جي سرپرستي ڪندڙ وزيرن کي گرفتار ڪيو وڃي. اڳواڻن چيو تہ قدرتي دولت سان مالا مال ھجڻ باوجود سنڌ ۾ بک، بدحالي ۽ بيروزگاري عروج تي آھي. نوجوانن کي روزگار ڏنو وڃي.