ٺٽي ۾ ٽرالر جي ٽڪر ۾ 3 نوجوان فوت ٿيڻ واري واقعي خلاف سندن وارثن جو ڌرڻو

ٺٽو سجاول روڊ تي ٽرالر جي ٽڪر ۾ موٽر سائيڪل سوار جعفر بروهي، ذوالفقار جاکرو ۽ عباس جاکرو فوت ٿي ويا هئا

ٺٽو (ڊ ر) ٺٽي ۾ ڪجهه ڏينهن اڳ ٽرالر حادثي ۾ فوت ٿيلن جي وارثن پاران احتجاجي ڌرڻو، تفصيل موجب ڪجهه ڏينهن اڳ ٺٽي-سجاول روڊ تي تيز رفتار ٽرالر جي ٽڪر ۾ موٽرسائيڪل سوار جعفر بروهي، ذوالفقار جاکرو ۽ عباس جاکرو فوت ٿي ويا هئا. ٽرالر ڊرائيور کي گرفتار نه ڪرڻ ۽ متاثرين جي وارثن کي انصاف نه ملڻ تي متاثرين جي خاندانن پاران مڪلي بائي پاس تي قومي شاهراهه تي احتجاجي ڌرڻو هنيو ويو، ڌرڻي ۾ عورتن به وڏي انگ ۾ شرڪت ڪئي، جڏهن ته احتجاج جي اڳواڻي فوتين جي وارثن شريف جاکرو، اصغر جاکرو، ارباب جاکرو ۽ ٻيا ڪري رهيا هئا. ڌرڻي سبب سوين گاڏيون قومي شاهراهه تي ہيھي رھيون ۽ ٽريفڪ جو نظام درهم برهم ٿي ويو. احتجاج ڪندڙن چيو ته ٺٽي ۾ ھيوي ٽريفڪ جي لاپرواھي سبب حادثا روز جو معمول بڻجي ويا آهن، پر ٽريفڪ پوليس ڀتا خوري ۾ مصروف آهي. ٽرالر سان ٽڪر ۾ اسان جا ٽي نوجوان فوت ٿي ويا، پر اڃا تائين نه ته ڊرائيور کي گرفتار ڪيو ويو آهي ۽ نه ئي سي سي ٽي وي فوٽيج سامهون آندو ويو آهي. وارثن مطالبو ڪيو ته پوليس ٽرالر ڊرائيور کي فوري طور تي گرفتار ڪري، ٻي صورت ۾ احتجاجي ڌرڻو جاري رهندو. احتجاجي اڳواڻن صحافين سان ڳالهائيندي چيو ته جيڪڏهن انصاف نه مليو ته احتجاج جو دائرو ڪيو ويندو.