ٺٽي ۾ بدامني جي باهه ڀڙڪيل، واپاري جي گهر مان ڏينهن ڏٺي جو ڌاڙو

ٻن ڄڻن کي عورتاڻو لباس پهريل هو، هٿيارن جي زور تي يرغمال بڻايو ويو: شبير ميمڻ

ٺٽو( شفيق ڀٽي)ٺٽي شھر جي واريا محلي ۾ ڏينهن ڏٺي نامعلوم هٿياربندن جي ڦر جي وڏي واردات، واپاري شبير ميمڻ جي گهر مان روڪ رقم ۽ سون ڦر ، واقعي وقت گهر جا مرد جمعي جي نماز لاءِ ويل هئا، جنهن جو جوابدارن مڪمل فائدو وٺندي واردات ڪئي.تفصيل موجب ٻٽ ٻڌل چار هٿياربند شبير ميمڻ جي گهر ۾ داخل ٿي تقريبن 3 لک روڪ رقم، 3 تولا سون ۽ هڪ ٽچ موبائل فون ڦر ڪري بغير مزاحمت جي فائرنگ ڪندا فرار ٿي ويا. مليل ڄاڻ موجب ڦوروئن مان ٻن کي عورتاڻو برقعو پاتل ھو ۽ ٻن کي ٻٽ ٻڌل ھو ، جڏهن ته جوابدار هڪ 125 موٽر سائيڪل ۽ هڪ چائنا موٽر سائيڪل تي سوار ٿي آيا ھئا .ياد رهي ته شبير ميمڻ ٺٽي جي مشهور واپاري عبدالرحمان ميمڻ جو ڀاءُ آهي. واقعي دوران گهر ۾ صرف هڪ عورت ۽ ٻه ننڍا ٻار موجود هئا، جن خوفزده ٿي سون ۽ روڪ رقم ڦوروئن حوالي ڪري ڇڏي.شهر جي سياسي ، سماجي اڳواڻن ۽ شهرين وڌندڙ ڦرن ۽ چورين جي واقعن تي سخت ڳڻتي جو اظهار ڪندي چيو آهي ته ٺٽو پوليس جي رِٽ مسلسل ڪمزور ٿي رهي آهي، جنهن سبب شهر جا ماڻهو ھاڻي پنهنجي گهرن اندر به محفوظ ناھن ھنن ايس ايس پي ٺٽو ۽ ٻين وس وارن کان مطالبو ڪيو آهي ته امن امان جي خراب ٿيندڙ صورتحال کي جلد بهتر بڻايو وڃي ۽ شهرين جي جان ۽ مال جي حفاظت لاءِ فوري قدم کنيا وڃن.