گلشن حديد ۾ موٽرسائيڪل ڦورو ٽولي جون وارداتون جاري، ميڊيڪل اسٽور تان ڏهون ڀيرو ڦر

صحافي سامي ميمڻ جي ڀاڻيجي خالد ميمڻ جي ميڊيڪل اسٽور تان ڏهون ڀيرو ڌاڙو هني فرار ٿي ويا

ملير(رپورٽ: عبدالرشيد مورجھريو) گلشنِ حديد مان هڪ هفتو اڳ شهري ولي ٻگهيو کان ڦر ڪيل ون ٽو فائيَو موٽر سائيڪل سوار ٽن هٿياربند ڦورو ٽولي علائقي ۾ ڏوهن جو راڄ قائم ڪري ڇڏيو آهي، جنهن سبب رهواسين ۾ شديد خوف ۽ عدم تحفظ پکڙيل آهي ساڳئي ڦورو ٽولي سينيئر صحافي سامي ميمڻ جي ڀاڻيجي خالد ميمڻ جي ميڊيڪل اسٽور تان ڏهون ڀيرو ڦر ڪئي آهي جنهن جا سي سي ٽي وي فوتيجز پڻ پوليس کي ڏنا ويا آهن . ڄاڻايل ڦورو تولو ڏينهن توڙي رات بي ڊپائي سان راهگيرن، دڪانن ۽ رهائشي گهرن کي نشانو بڻائي موبائيل فون، روڪ رقم ۽ قيمتي سامان ڦري فرار ٿي وڃن ٿا.علائقي واسين موجب ڪيترين ئي شڪايتن باوجود پوليس طرفان ڪا به اثرائتي ڪارروائي نه ٿي سگهي آهي، جڏهن ته ڪمزور گشت سبب ڏوهاري کلي عام گھمي رهيا آهن. شهرين جو چوڻ آهي ته پوليس جي گرفت ڪمزور ٿي چڪي آهي، والدين ٻارن کي اسڪول موڪلڻ کان به ڊڄڻ لڳا آهن ۽ دڪاندار به خوف هيٺ ڪاروبار ڪرڻ تي مجبور آهن.ڦر جو شڪار ٿيل شهري ولي ٻگهيو ٻڌايو ته هڪ مهينو اڳ ٽي چور پيادل اچي سندس موٽر سائيڪل ۽ ٻيو سامان ڦري ويا، جيڪا موٽر سائيڪل هاڻي ساڳيا ڏوهاري استعمال ڪري گلشنِ حديد ۾ لڳاتار وارداتون ڪري رهيا آهن، جڏهن ته پوليس کي بار بار اطلاع ڏيڻ باوجود ڪا به ڪارروائي عمل ۾ نه آئي آهي.علائقي واسين ايس ايس پي ملير ۽ اعليٰ پوليس اختيارين کان مطالبو ڪيو آهي ته فوري نوٽيس وٺي ڦورو ٽولي خلاف سخت قدم کنيا وڃن ۽ شهرين جي جان ۽ مال جو تحفظ يقيني بڻايو وڃي