عمرڪوٽ جي عائشه مارڪيٽ کاٽ ڪيس ۾ وڏي اڳڀرائي

ڪراچي مان 4ڪلو وڌيڪَ چاندي جا زيور ۽ ٽيجوڙي هٿ ڪري ورتا آهن: ايس ايڇ او سٽي

عمرڪوٽ (رپورٽ:ڪانجي مل رکيسر) عمرڪوٽ ۾ 24 ڏينهن اڳ عائشه مارڪيٽ ۾ مدن سوناري جي دڪان تي لڳل کاٽ ڪيس ۾ وڏي اڳڀرائي سامهون اچي وئي، پوليس گرفتار ٿيل ٻن جوابدارن جي نشاندهي تي ڪراچي مان وڌيڪَ چار ڪلو کان وڌيڪَ چاندي جا زيورات ۽ چوري ٿيل ٽجوريءَ هٿ ڪري ورتي آهي، نوابشاه پوليس طرفان شفيق کوکر ۽ حبيب الرحمان نالي ٻن جوابدارن کي سي سي ٽي وي فوٽيج ۽ لوڪيٽر ذريعي سڃاڻپ ڪري گرفتار ڪيو ويو هو، سوناري جي دڪان مان مجموعي طور 19 ڪلو چاندي جا زيورات ۽ هڪ لک رپيا نقد رقم چوري ٿي هئي، جنهن مان گرفتاري وقت 8 ڪلو چاندي اڳ ئي نوابشاه پوليس هٿ ڪئي هئي، ايس ايڇ او سٽي عمرڪوٽ احمد بخش راهمون موجب ٻنهي جوابدارن جا اعتراف ۽ نشاندهي اهم اڳڀرائين جو سبب بڻيا، هن چيو ته گرفتار جوابدارن جو تعلق لاهور سان آهي ۽ سنڌ جي مختلف ٿاڻن تي انهن مٿان ڌاڙن جا 10 کان وڌيڪَ ڪيس داخل آهن، گينگ ۾ پنج کان وڌيڪَ ماڻهون شامل آهن، جن مان ڪجهه اڃان روپوش آهن ۽ سندن گرفتاري لاءِ ٽيمون روانيون ڪري ڇڏيون آهن، فريادي مدن سوناري جو چوڻ هو ته دڪان مان ڪوبه سونو زيور چوري نه ٿيو هو، جڏهن ته پوليس جي ڪاروائي ۽ جاچ کان هو مطمئن آهي، سندس چوڻ آهي ته پوليس ڏينهن رات محنت ڪري سي سي ٽي وي فوٽيج ۽ لوڪيٽر ذريعي جوابدارن کي گرفتار ڪيو ۽ چوري ٿيل سامان واپس ڪرائڻ ۾ اهم ڪردار ادا ڪيو، گرفتار جوابدارن جو چوڻ آهي ته هنن صبح فجر جي وقت کاٽ هنيو ۽ ٽجوريءَ سميت چاندي جا زيورات چوريءَ ڪري فرار ٿيا، هنن اعتراف ڪيو ته سندن گينگ پنج ماڻهن تي مشتمل آهي، جيڪو مختلف شهرن ۾ منظم طريقي سان ڌاڙا هڻندا آهن، پوليس موجب وڌيڪَ جاچ جاري آهي ۽ باقي مفرور جوابدارن کي به جلد قانون جي ڪٽهڙي ۾ آندو ويندو.