ڪنري ۾ اتي چڪين کي سرڪاري ڪوٽا تحت ڪڻڪ نه ملڻ خلاف احتجاجي مظاهرو

عمرڪوٽ(رپورٽ:ڪانجي مل رکيسر)ڪنري تعلقي ۾ اٽي چڪين کي سرڪاري ڪوٽي جي ڪڻڪ فراهم نه ڪرڻ خلاف چڪي مالڪن جو احتجاجي مظاهرو، نعريبازي، خوراڪ کاتي تي ڪڻڪ وڪرو ڪرڻ ۽ بدعنواني جا سنگين الزام، رمضان المبارڪ ۾ اٽي جو سخت بحران پيدا ٿيڻ ۽ اٽو وڌيڪ مهانگو ٿيڻ جو خدشو. تفصيل موجب ڪنري ۾ سرڪاري ڪوٽا جي ڪڻڪ فراھمي نه ٿيڻ خلاف آٽا چڪي ايسوسيئيشن جي سڏ تي چڪي مالڪن نيشنل پريس ڪلب ڪنري آڏو احتجاجي مظاهرو ڪيو ۽ پريس ڪانفرنس ڪئي، ان موقعي تي صدر منير آرائين، روهت ڪمار، عرفان عباس، هريش ڪمار، عارف آرائين ۽ ٻين چيو ته خوراڪ کاتي جي لاپرواھي عروج تي آھي، گذريل مهيني کين اڌ ڪوٽا جي ڪڻڪ فراھم ڪري باقي ڪڻڪ خوراڪ کاتي وارن وڪرو ڪري ڇڏي، جڏهن ته هلندڙ مهيني کين هڪ به ٻوري فراهم نه ڪئي وئي آهي. هنن الزام هنيو ته ڊي ايف سي ۽ لاڳاپيل انتظاميا جي ملي ڀڳت سان ڪنري جي ڪڻڪ وڪرو ڪئي وئي آهي ۽ هاڻي کين ٻين ضلعن مان ڪڻڪ ڏيڻ جا ڪوڙا آسرا ڏنا پيا وڃن. ڪڻڪ جي سخت کوٽ سبب مارڪيٽ ۾ اٽو مهانگو ٿي ويو آهي ۽ هن وقت اٽو 120 رپيا في ڪلو وڪرو ٿي رهيو آهي، جنهن ۾ وڌيڪ واڌ جو امڪان پڻ آهي. چڪي مالڪن جو چوڻ هو ته انسپيڪٽر زبردستي ۽ هٺ ڌرمي سان ڪم ڪري رهيو آهي ۽ سرڪاري ڪوٽو فراهم نه پيو ڪيو وڃي. هنن چيو ته ضلعي ۽ مقامي انتظاميا کي ڪيترائي ڀيرا آگاهه ڪرڻ باوجود ڪا به ٻڌڻي نٿي ٿئي، جڏهن ته خوراڪ کاتي طرفان ڪنهن به قسم جو سهڪار نٿو ڪيو وڃي. رمضان المبارڪ جهڙي مقدس مهيني جو به ڪو لحاظ نٿو رکيو وڃي ۽ رشوت خوري عام ٿي چڪي آهي. چڪي مالڪن خبردار ڪيو ته جيڪڏهن فوري طور سرڪاري ڪوٽي جي ڪڻڪ فراهم نه ڪئي وئي ته هو چڪيون بند ڪرڻ تي مجبور ٿي ويندا، جنهن جي سموري ذميواري خوراڪ کاتي جي عملدارن تي عائد ٿيندي.