قومي عوامي تحريڪ جي سڏ تي پئٽرول ۽ ڊيزل جي اگهن ۾ واڌ خلاف سڄي سنڌ ۾ مظاهرا ۽ ڌرڻا

حيدرآباد/خيرپور ناٿن شاھ / ماتلي / ٻڍو قمبراڻي /ملير /شاھپورچاڪر / ڏھرڪي : پئٽرول ۽ ڊيزل مھانگو ڪرڻ خلاف قومي عوامي تحريڪ جي مرڪزي سڏ تي ٽي ڏينھن بہ سنڌ جي مختلف شھرن ۾ مظاھرا ۽ ريليون ڪڍي ڌرڻا ھنيا ويا. ڪارڪنن پئٽرول مھانگو ڇو ڀلا، ڊيزل مھانگو ڇو ڀلا ڪربلا ڪربلا سميت مختلف نعرا ھڻي قيمتون واپس وٺڻ جو مطالبو ڪيو. ان ڏس خيرپور ناٿن شاھ ۾ قومي عوامي تحريڪ ضلعي دادو جي آرگنائيزر سومر چانڊيو، ايڊوڪيٽ مير کوسو ايڊووڪيٽ ، اصغر رند،جاويد چانڊيو، سڄڻ سيتائي، باغي وفا انور جانوري جي اڳواڻي ۾ احتجاجي مظاهرو ڪيو. ماتلي شهر ۾ قومي عوامي تحريڪ جي اڳواڻ صدر ڪيلاش مڪواڻه ڪولھي،غلام محمد چانڊيو، ارشاد خاصخيلي، مالشي ڪولھي، تاج خاصخيلي جي اڳواڻي ۾ احتجاجي مظاهرو ڪري مين بس اسٽاپ چوڪ تي ڌرڻو هنيو ويو. ٻڍوقمبراڻي ۾ قومي عوامي تحريڪ جي اڳواڻن نثار ڀرڳڙي، شوڪت علي نوحاڻي، پير بخش ڪلوئي ۽ ٻين جي اڳواڻي ۾ سورھيه بادشاھ چوڪ کان ريلي ڪڍي ٻڍوقمبراڻي پريس ڪلب اڳيان احتجاجي مظاهرو ڪيو ويو. ملير جي علائقي رزاق آباد ۾ قومي عوامي تحريڪ جي اڳواڻن جنسار ھيسباڻي، ھريرام سنڌي،لالچند، لڇمڻ ۽ پنھون جي اڳواڻي ۾ رزاق آباد نيشنل ھاوي کان احتجاجي ريلي ڪڍي عوامي پريس ڪلب آڏو ڌرڻو هنيو ويو. شاھپورچاڪر ۾ قومي عوامي تحريڪ جي اڳواڻن محمود رخشاڻي، حضور بخش ڏاھري ۽ ٻين جي اڳواڻي ۾ 15 چوڪ کان پريس ڪلب شاهپور چاڪر تائين احتجاجي ريلي ڪڍي وئي. ڏھرڪي ۾ قومي عوامي تحريڪ جي اڳواڻن تراب علي شر، ڪامريڊ رمضان، منير آرائين، محبت سميجو تعلقي واجد علي ڏهر ڪمال خان شر گلشير سميجو امجد شر راشد علي ڪانڃون ۽ ٻين جي اڳواڻي ۾ عوامي هوٽل کان ڊان چوڪ تائين احتجاجي مظاهرو ڪري ڌرڻو هنيون ويو. ان موقعي تي اڳواڻن چيو تہ تيل مھانگو ڪري غريب عوام کي ماني گھر کان محروم ڪيو ويو آھي. پ پ، ن ليگ ۽ ايم ڪيو ايم گڏجي مھانگائي جو بم ڪيرايو آھي. 80 روپيا گھٽتائي قبول ناھي. پئٽرول سان گڏ ڊيزل جا اگھ به گھٽايو وڃن. حڪومت کي 246 روپيا ليٽر تيل ملي ٿو، ان جو اگھ پوڻا 4 سئو تائين وڌائڻ سراسر ظلم ۽ زيادتي آھي.