ملير: 137سال پراڻي تاريخي آسو وليج اسڪول کي ضم ڪرڻ واري فيصلي خلاف احتجاج

ملير (رپورٽ: عبدالرشيد مورجھريو) سنڌ حڪومت جي تعليم کاتي پاران 137 سال پراڻي تاريخي تعليمي اداري گورنمينٽ پرائمري بوائز اينڊ گرلز اسڪول آسو وليج کي گلِ رعنا سيڪنڊري اسڪول ۾ ضم ڪرڻ واري فيصلي خلاف علائقي واسين سخت ڳڻتي جي لهر پکڙجي ويئي آهي هنن سخت احتجاج ڪندي ان فيصلي کي فوري طور واپس وٺڻ جو مطالبو ڪيو آهي.علائقي واسين موجب گورنمينٽ پرائمري بوائز اينڊ گرلز اسڪول آسو وليج 1889ع ۾ قائم ڪيو ويو هو، جيڪو علائقي جي تعليمي تاريخ، سڃاڻپ ۽ ورثي جي علامت آهي. هنن جو چوڻ آهي ته بعد ۾ گلِ رعنا سيڪنڊري اسڪول کي هن ئي تعليمي اداري جي حدن اندر منتقل ڪيو ويو هو، تنهنڪري هن تاريخي اسڪول جي الڳ سڃاڻپ ختم ڪرڻ علائقي جي تعليمي تاريخ سان ناانصافي جي برابر آهي. علائقي جي رهواسين وڌيڪ انڪشاف ڪيو ته تعليم کاتي جي ضلعي عملدارن گورنمينٽ پرائمري اسڪول فاطمي کي پڻ آسو وليج اسڪول جي عمارت ۾ منتقل ڪري ڇڏيو آهي، جنهن سبب اڳ ئي محدود جڳهه ۽ ڪلاس رومز جي کوٽ جا مسئلا وڌيڪ سنگين ٿي ويا آهن. علائقي واسين سنڌ جي وڏي وزير، صوبائي وزير تعليم، تعليم کاتي جي اعليٰ عملدارن، چونڊيل نمائندن ۽ مقامي بلدياتي قيادت کان مطالبو ڪيو آهي ته آسو وليج اسڪول جي تاريخي حيثيت بحال ڪئي وڃي، انضمام وارو فيصلو واپس ورتو وڃي، اسڪول فاطمي کي ڪنهن مناسب متبادل هنڌ منتقل ڪيو وڃي ۽ اسڪول کي درپيش جڳهه ۽ بنيادي سهولتن جي کوٽ کي فوري طور ختم ڪيو وڃي.هنن چيو ته آسو وليج اسڪول رڳو هڪ تعليمي ادارو نه، پر 137 سالن جي تعليمي تاريخ جو امين آهي، جنهن جي سڃاڻپ، وقار ۽ مستقبل جو تحفظ اسان سڀني جي گڏيل ذميواري آهي.