ڇهين نيشنل جونيئر گيمز ۾ ڪاميابي ماڻيندڙ ڪراچي جي رانديگرن جو شاندار استقبال

سنڌ جي ايٿليٽن پڻ وڏي جوش ۽ جذبي سان حصو وٺندي پنهنجي صلاحيتن جو ڀرپور مظاهرو ڪيو

ملير (رپورٽ: عبدالرشيد مورجھريو) پشاور جي قيوم اسٽيڊيم ۾ 7 جون تي منعقد ٿيل ڇهين نيشنل جونيئر گيمز ۾ شاندار ڪارڪردگي ڏيکارڻ کانپوءِ سنڌ جي رانديگرن جو ڪراچي ڪينٽ اسٽيشن پهچڻ تي والهاڻي ۽ ڀرپور استقبال ڪيو ويو تفصيل موجب انهن راندين ۾ ملڪ جي سمورن صوبن مان رانديگرن شرڪت ڪئي، جتي سنڌ جي ايٿليٽن پڻ وڏي جوش ۽ جذبي سان حصو وٺندي پنهنجي صلاحيتن جو ڀرپور مظاهرو ڪيو ڪراچي جي سامونڊي علائقي ابراهيم حيدري سان تعلق رکندڙ نوجوان رانديگرن شاندار ڪارڪردگي ڏيکاريندي 4×100 ميٽر ريس ۾ ٽين پوزيشن حاصل ڪئي. ڪاميابي ماڻيندڙ رانديگرن ۾ امان الله، اسو بلوچ، مزمل ۽ محمد انس شيخ شامل آهن علائقي ۾ خوشيءَ جي لهر جڏهن ڪامياب رانديگر پنهنجي اباڻي علائقي ابراهيم حيدري پهتا ته علائقي واسين سندن شاندار ۽ تاريخي استقبال ڪيو. ان موقعي تي شهرين چيو ته اسان جي علائقي ۾ راندين جي سهولتن جي کوٽ سميت ڪيترائي مسئلا موجود آهن، پر انهن سمورين مشڪلاتن باوجود جيڪڏهن اسان جا نوجوان بهترين ڪارڪردگي ڏيکاري ملڪ، علائقي ۽ نوجوانن جي نمائندگي ڪري رهيا آهن ته اها اسان سڀني لاءِ وڏي فخر جي ڳالهه آهي. رانديگرن جو عزم ۽ اختيارين کي اپيل ڪامياب رانديگرن ميڊيا سان ڳالهائيندي ٻڌايو ته صوبي ۾ انهن راندين لاءِ باقاعده چونڊ مقابلا (ٽرائلز) منعقد ڪيا ويندا آهن، جن ۾ سخت مقابلي کانپوءِ رانديگرن کي اڳتي وڌڻ جو موقعو ملندو آهي. هنن عزم ظاهر ڪيو ته هو وڌيڪ محنت جاري رکندا ته جيئن قومي سطح سان گڏ عالمي مقابلن ۾ پڻ پاڪستان جو نالو روشن ڪري سگهن. ٻئي طرف علائقي واسين لاڳاپيل اختيارين ۽ چونڊيل نمائندن کان مطالبو ڪيو ته اهڙن باصلاحيت نوجوانن جي همٿ افزائي ڪئي وڃي، کين بهتر راندين جون سهولتون ۽ سرڪاري سطح تي سهڪار فراهم ڪيو وڃي، ته جيئن هو مستقبل ۾ ملڪ ۽ قوم جو نالو وڌيڪ روشن ڪري سگهن.