سکر واسي جوڙي نوشهروفيروز جي عدالت ۾ پرڻو ڪري ڇڏيو

ڪشش ۽ روهيت عدالت ۾ ڪرڻو ڪري ڇڏيو، تحفظ جو مطالبو

نوشهرو فيروز (ڊر)سکر سان تعلق رکندڙ هندو پريمي جوڙي نوشهرو فيروز جي جسٽس آف پيس جي عدالت ۾ پنهنجي رضا مندي سان هندو مذهب موجب شادي ڪري ورتي. تفصيل موجب، سکر بئراج ڪالوني جي رهواسڻ ڪشش ۽ سکر ايڪسائيز آفيس واري علائقي جي رهواسي روهيت شادي بعد پريس ڪلب نوشهرو فيروز ۾ پريس ڪانفرنس ڪندي چيو ته هنن پنهنجي مرضي سان پيار جو پرڻو ڪيو آهي. جنهن کانپوءِ ناري جا مائٽ، جن ۾ ساجن، ارهن، ڪالو، جنگو، ڪشور، جوجي، سنيل، هري ۽ آديش شامل آهن، سندن جان جا ويري بڻجي ويا آهن ۽ کين موتمار ڌمڪيون ڏئي رهيا آهن. هنن وڌيڪ دعويٰ ڪئي ته سندن خلاف سکر ۾ ڪوڙو ڪيس پڻ داخل ڪرايو ويو آهي، جنهن سبب هو دربدري واري زندگي گذارڻ تي مجبور آهن. جوڙي اعليٰ اختيارين، ايس ايس پي سکر ۽ ايس ايس پي نوشهرو فيروز کان اپيل ڪئي ته کين قانوني تحفظ فراهم ڪيو وڃي، جيئن هو بنا خوف جي سڪون واري زندگي گذاري سگهن.