سنڌي ادبي سنگت ملير جي نون عهديدارن جي مان ۾ آجياڻو

عوامي پريس ڪلب ملير ۾ ادبي، صحافتي ۽ سماجي شخصيتن جي ڀرپور شرڪت

ملير(رپورٽ: عبدالرشيد مورجھريو) سنڌي ادبي سنگت ملير جي نون چونڊيل عهديدارن، سيڪريٽري مجيب سنڌي سميت سموري ڪابينا جي مان ۾ عوامي پريس ڪلب ملير پاران پريس ڪلب جي بابا اڪبر بلوچ ميموريل هال ۾ آجياڻي تقريب ڪوٺائي وئي، جنهن ۾ سياسي، سماجي، ادبي ۽ صحافتي حلقن سان واسطو رکندڙ شخصيتن وڏي انگ ۾ شرڪت ڪئي۔ تقريب ۾ ملير، گلشن حديد، پپري، چوڪنڊي ۽ ٻين علائقن جي ادبي شاخن جي عهديدارن، اديبن، شاعرن ۽ صحافين ڀرپور شرڪت ڪري نون چونڊيل عهديدارن کي مبارڪون پيش ڪيون۔ان موقعي تي عوامي پريس ڪلب ملير پاران نون چونڊيل عهديدارن کي گلن جا هار پارايا ويا ۽ سنڌ جي ثقافتي سڃاڻپ طور اجرڪن جا تحفا پڻ پيش ڪيا ويا ان موقعي تي آجياڻي تقريب کي خطاب ڪندي عوامي پريس ڪلب جي عهديدار سامي ميمڻ چيو ته ادب ۽ صحافت سماج جا ٻه اهم شعبا آهن، جيڪي سماجي سجاڳي ۽ شعور جي واڌاري ۾ بنيادي ڪردار ادا ڪن ٿا۔ هن چيو ته سنڌي ادبي سنگت سنڌي ٻولي، ادب ۽ ثقافت جي واڌاري لاءِ تاريخي خدمتون سرانجام ڏئي رهي آهي، جڏهن ته عوامي پريس ڪلب هميشه ادب دوست سرگرمين جي سرپرستي ڪندو رهندو سماجي اڳواڻ خدا ڏنو شاھ پنهنجي خطاب ۾ چيو ته ملير جي ادبي فضا هميشه سگهاري رهي آهي ۽ هتي جا اديب ۽ شاعر سنڌي ادب جي واڌ ويجهه لاءِ اهم ڪردار ادا ڪري رهيا آهن۔ هن چيو ته نون چونڊيل عهديدارن کان اميد آهي ته اهي ادبي سرگرمين کي وڌيڪ فعال بڻائيندا ۽ نوجوان نسل کي ادب سان جوڙڻ لاءِ ڀرپور ڪوششون ڪندا نئين چونڊيل سيڪريٽري مجيب سنڌي چيو ته اهڙيون تقريبون ادب، صحافت ۽ سماجي هم آهنگي کي هٿي ڏيڻ ۾ اهم ڪردار ادا ڪن ٿيون۔ هن عوامي پريس ڪلب ملير پاران نون چونڊيل عهديدارن جي مان ۾ آجياڻي تقريب ڪوٺائڻ واري عمل کي ساراهيندي چيو ته اها ادبي حلقن لاءِ هڪ مثبت ۽ همٿ افزا روايت آهي تقريب کي سڪندر سرواڻ ، امرتا ڏاهري ،غفور شاھ تقوي، اصغر مهرائي ، قمبر ٻٽ،ايم زمان ۽ ٻين پڻ خطاب ڪيو.