ميرپورخاص ۾ پي وي ڊي پي پاران مفت طبي ڪئمپ قائم ڪئي وئي

جنرل فزيشن، زنانا بيمارين جي ماھر ڊاڪٽرياڻين ، اکين جي ڊاڪٽرن ۽ ٻين ماھر ڊاڪٽرن مريضن جو معائنو ڪيو

ميرپورخاص (بيورو) ميرپورخاص جي سماجي تنظيم پي وي ڊي پي پاران ايڪشن ميڊور جرمني جي سهڪار سان هڪ ڏينهن واري مفت طبي ڪئمپ لڳائي وئي. تفصيل موجب ميرپورخاص جي سماجي تنظيم PVDP پاران ايڪشن ميڊور جي سهڪار سان ڳوٺ عبدالڪريم مهر يوسي جھلوري ۾ هڪ ڏينهن جي مفت طبي ڪيمپ لڳائي وئي. جنهن ۾ جنرل فزيشن، زنانا بيمارين جي ماھر ڊاڪٽرياڻين ، اکين جي ڊاڪٽرن ۽ ٻين ماھر ڊاڪٽرن مريضن جو معائنو ڪيو، جڏهن ته آءِ آر ڊي پاران ڪيمپ ۾ مريضن جا 300 کان وڌيڪ مفت ايڪسري، بلگم ۽ هيپاٽائيٽس (سي) جا ٽيسٽ ڪيا ويا. ڪيمپ ۾ ايڪسري ۽ بلگم ٽيسٽ جي فوري رزلٽ لاء موبائل سروس جو پڻ انتظام ڪيو ويو. ڪيمپ ۾ سمورن مريضن کي مفت دوائون فراهم ڪيون ويون، ان موقعي تي پي وي ڊي پي جي ڊپٽي ڊائريڪٽر سليم ڊومينڪ صحافين سان ڳالهائيندي چيو ته پي وي ڊي پي جي طرفان هي ڪيمپ ايڪشن ميڊور جرمني سھڪار سان غريب ماڻهن ۾ بيمارين جي ڄاڻ لاءِ آهي. جنهن ۾ IRD مفت ٽيسٽ سرور فراهم ڪيو آهي جنهن ذريعي ڳوٺاڻن تي مختلف ٽيسٽ ڪيا ويا آهن. ۽ ڪيمپ ۾ 1200 جي لڳ ڀڳ ماڻهن جو چيڪ اپ ڪيو ويو ۽ کين دوائون فراهم ڪيون ويون، پي ڊي پي جو مقصد ڳوٺن جي ماڻهن کي طبي سهولتون فراهم ڪرڻ آهي.ان موقعي تي پرويز حيدرـ لينا خالد زاھد پنھور ۽ ٻيا پڻ موجود ھئا