فلسطين ۾ تاريخ جي بدترين دھشتگردي ٿي رھي آھي، دنيا چپ آھي: اياز لطيف پليجو

فلسطين ۾ تاريخ جي بدترين دھشتگردي ٿي رھي آھي، دنيا چپ آھي: اياز لطيف پليجو

حيدرآباد (بيورو) قومي عوامي تحريڪ جي سربراھ اياز لطيف پليجي چيو آھي تہ فلسطين ۾ تاريخ جي بدترين دھشتگردي ٿي رھي آھي۔ معصوم ماڻھن کي قتل ڪيو پيو وڃي۔ اقوام متحده کي اسرائيلي جارحيت نظر نٿي اچي۔ آمريڪا آڏو بيوس بنيل ملڪن اسرائيلي دھشتگردي کي روڪڻ بدران پنھنجون اکيون بند ڪري ڇڏيون آھن. اسرائيل حق ۽ سچ جو آواز دٻائڻ لاء ميڊيا ھائوسز تي حملا ڪري رھيو آھن۔ اسپتالن تي حملا ڪري معصوم ٻارڙن کي بہ نشانو بنايو پيو وڃي. مسلمان ملڪن مجرماڻي خاموشي نہ ٽوڙي تہ انھن جو وارو اچڻ تي اڪيلا رھجي ويندا۔ آمريڪا اسرائيلي دھشتگردي کي ھٿي ڏئي رھيو آھي۔ اياز لطيف پليجي چيو تہ اسرائيل ظلم، بربريت ۽ دھشتگردي جو بنياد آھي۔ اسرائيل معصوم ٻارن ۽ عورت جو قاتل آھي۔ عالمي دنيا اسرائيلي دھشتگردي آڏو خاموش تماشائي آھي۔ اھو عمل اسرائيلي بربريت کان بہ وڏو ڏوھ آھي۔ اياز لطيف پليجي چيو تہ اسرائيلي جنگي جارحيت کي روڪڻ لاء اقوام متحده ۽ اسلامي ملڪن کي عملي ڪردار ادا ڪرڻو پوندو۔ ھي وقت مذمت کان اڳتي وڌي عمل ۾ اچڻ جو آھي۔ اياز لطيف پليجي چيو تہ خطرناڪ ھٿيارن جي نالي ۾ آمريڪا عراق کي ملبي جو ڍير بنائي ڇڏيو پر اتان ڪو بہ ھٿيار ھٿ نہ آيو۔ اسرائيل انھي آمريڪا جو ناجائز اولاد آھي جنھن فلسطين تي ظلم جا پھاڙ ڪيرائي ڇڏيا آھن۔ اياز لطيف پليجي چيو تہ الميو اھو آھي جو انساني حقن جي عالمي تنظيمن بہ اکيون بند ڪري ڇڏيون آھن۔ دنيا ۾ اسرائيلي ظلم خلاف وڏي ۾ وڏا احتجاج ٿي رھيا آھن۔ فلسطين جا ماڻھو پنھنجي بقا جي جنگ وڙھي آھن۔