ريٽ لسٽ کان وڌيڪ قيمتون وٺندڙن خلاف سخت ڪاروائي ڪئي ويندي: ڊي سي شڪارپور

گڏجاڻي دوران مرغي، تيل، گيهه، کنڊ ۽ انڊن ۽ ٻين عام واهپي جي شين جا اگهه مقرر ڪيا ويا

شڪارپور ( احسان ابڙو )ڊپٽي ڪمشنر شڪارپور واپارين ۽ ڪريانه مرچنٽ ايسوسيئيشن وارن سان گڏجاڻي ڪري روز مره جي کاڌي پيتي جي شين جا اگهه مقرر ڪيا۔ريٽ لسٽ کان وڌيڪ قيمتون وٺندڙن جي خلاف سخت ڪاروائي ڪري ڳرا ڏنڊ لڳايا ويندا۔ ڊي سي شڪارپور، تفصيل موجب ڊپٽي ڪمشنر آفيس شڪارپور ۾ ڊپٽي ڪمشنر شڪارپور الطاف احمد چاچڙ جي صدارت ۾ واپارين ۽ ڪريانه مرچنٽ، ۽ ٻين ايسوسيئيشن جي اڳواڻن سان گڏجاڻي ڪري روز مره جي کاڌي پيتي جي شين جا اگهه مقرر ڪيا. گڏجاڻيءَ ۾ چئني تعلقن جا اسسٽنٽ ڪمشنر ۽ مختيارڪار، ايڊيشنل ڊائريڪٽر ايگريڪلچر خدا بخش ڪلوڙ، پرائيز انسپيڪٽرس شاهنواز مهر، گڊائون انسپيڪٽر غلام مصطفيٰ پٺاڻ، ڪريانه مرچنٽ ايسوسيئيشن جو صدر فائق علي ميمڻ، نائب صدر جئپالداس، صدر سبزي مارڪيٽ آغا نصيب الله ۽ ٻين آفيسرن پڻ شرڪت ڪئي.. گڏجاڻيءَ سان خطاب ڪندي ڊپٽي ڪمشنر شڪارپور الطاف احمد چاچڙ چيو تہ روز مره جي کاڌي پيتي جي شين جا اگهه هن ريت مقرر ڪيا ويا آهن ۽ وڌيڪ قيمتون وٺندڙن خلاف سخت ڪارروائي ڪئي ويندي. هن چيو ته هر دڪاندار پنهنجي پنهنجي دڪانن تي ريٽ لسٽ ظاهر نه ڪئي يا مقرر اگهن کان وڌيڪ اگهه ورتا ويا ته ان سلسلي ۾ ان جي خلاف قانوني ڪارروائي ۽ ڳرا ڏنڊ لڳايا ويندا. هن چيو ته ڪجھ شين جا ريٽ اوپن رکيا ويا آهن. جن ۾ مرغي، تيل، گيهه، کنڊ ۽ انڊا شامل آهن،انهن جا ريٽ صبح سوير تعلقن جي مختيارڪارن ۽ اسسٽنٽ ڪمشنرن کي ڏنا وڃن ته جيئن هو اوپن ريٽ کي روزانو جي بنياد تي چيڪ ڪري سگهن. هن چيو ته گهٽ آمدني رکندڙ ماڻهو قيمتون وڌي وڃڻ سبب پريشان ٿي وڃن ٿا. ان موقعي تي روز مره جي کاڌي پيتي جي شين جا اگهه ھن ريت مقرر ڪيا ويا. جن ۾ دال مسور 270 روپيه، دال مڱ صاف 420 روپيه، دال مڱ هلڪي 340 روپيه، دال مڱ ڀمپر 390 روپيه، دال ماڇ 460 روپيه، چڻن جو بيسڻ 390 روپيه، چڪيءَ جو اٽو 90 روپيه، فلور چڪي اٽو 80 روپيه، اسپيشل اٽو 90 روپيه، سوجي 95 روپيه، باسمتي ڪرنل چاور (پنجاب) من 160 کان 180 روپيه، چانور باسمتي ڪرنل (سنڌ) 230 روپيه، چانور باسمتي ڏارو 110 کان 120 روپيه، ميدو 100 روپيه، ڳڙ 170 کان 180 روپيه، مٺائي 170 کان 180 روپيه، مينهن جو گوشت 600 روپيه، ڳائو گوشت 900 روپيه، ٻاڪرو گوشت 1600 روپيه، مڇي 2 ڪلو کان مٿي واري 500 روپيه، مڇي 1ڪلو کان مٿي 430 روپيه، مڇي 1 ڪلو کان گھٽ 350 روپيه، کارڪون 200 کان 400 روپيه، ڇولا 9 ايم ايم 340، بيسڻ مٽر 180 روپيه، ڳاڙها مرچ ثابت 620 روپيه ۽ پيٺل ڳاڙها مرچ سٺا 680 روپيه، ڳاڙها مرچ پيٺل هلڪا 400 روپيه، تازو کير 160 روپيه، ڏهي 220 روپيه في ڪلو مقرر ڪيا ويا آهن.