ٺٽو؛ ريجنل ڊائريڪٽر محتسب پاران آگاهي سيمينار منعقد ڪيو ويو

ٺٽو( محمد شفيق ڀٽي) ريجنل ڊائريڪٽر محتسب ٺٽو پاران آگاهي سيمينار منعقد ڪيو ويو ريجنل ڊائريڪٽر محتسب ٺٽو ھارون احمد خان چيو آهي ته صوبائي محتسب جو ادارو عوام جون شڪايتون جلد حل ڪرڻ لاءِ ڪوششون ڪري رهيو آهي، جيڪو بنا ڪنهن وڪيل، بنا دير ۽ بنا ڪنهن فرق جي ماڻهن کي انصاف فراهم ڪرڻ ۾ پنهنجو ڀرپور ڪردار ادا ڪري رهيو آهي. اهڙن خيالن جو اظهار هن گورنمينٽ بوائز ڊگري ڪاليج مڪلي ۾ صوبائي محتسب اداري جي اهميت، فائدن ۽ طريقيڪار جي حوالي سان هڪ آگاهي سيمينار کي خطاب ڪندي ڪيو. ريجنل ڊائريڪٽر محتسب جو چوڻ هو ته شهري ڪنهن به صوبائي کاتي خلاف پنهنجي جائز شڪايت صرف هڪ سادي ڪاغذ تي موڪلي سگهن ٿا، سندن مسئلو جلد حل ڪيو ويندو. هن شاگردن کي صوبائي محتسب جي مقصدن، اثرن ۽ ڪارڪردگي بابت تفصيلي آگاهي پڻ ڏني. هن چيو ته صوبائي محتسب جي ويزن ۽ هدايتن موجب عوام کي انصاف فراهم ڪيو پيو وڃي، مُلڪ ۾ انصاف فراهم ڪندڙ ادارا موجود آهن پر انھن تائين رسائي لاءِ بنيادي معلومات نه هجڻ سبب ڪيترائي ماڻهو ان کان محروم آهن. هن چيو ته ڪنهن به صوبائي کاتي ۾ جائز مسئلا حل ڪرڻ لاءِ اسان جي آفيسن ۾ درخواستون داخل ڪيون وڃن ته جيئن انهن مسئلن جي حل لاءِ قدم کڻي کين انصاف فراهم ڪيو وڃي ۽ انصاف تي ٻڌل هڪ بهتر سماج جوڙي سگهجي. هن چيو ته اسان جا دروازا هر انصاف گهرندڙ لاءِ کليل آهن.