شموليتي ترقي ۽ نوجوانن جو بااختيار ٿيڻ سنڌ جي پائيدار مستقبل جي ضمانت آهي، زرعي يونيورسٽي سيمينار

ٽنڊوڄام : تدريسي ۽ سماجي ماهرن چيو آهي ته سماجي شموليت ۽ نوجوانن جو بااختيار ٿيڻ سنڌ جي پائيدار سماجي ۽ معاشي ترقي اھم ڪردار ادا ڪري سگھن ٿا ۽ نوجوانن جي تعليم، جدت ۽ برادرين جي اوسر ۾ ڀرپور شموليت وقت جي اهم ضرورت آهي، هي ڳالهه سنڌ زرعي يونيورسٽي جي ڊاڪٽر اي۔ايم۔ شيخ آڊيٽوريم ۾ “پائيدار ترقي لاءِ سماجي شموليت ۽ نوجوانن جو بااختيار ڪرڻ” جي عنوان سان ٿيل سيمينار ۾ ڪئي ويئي۔ هي پروگرام اسٽوڊنٽس–ٽيچرز اينگيجمينٽ پروگرام تحت هائر ايجوڪيشن ڪميشن اسلام آباد، سنڌ هائير ايجوڪيشن ڪميشن ۽ حڪومت سنڌ جي سهڪار سان منعقد ڪيو ويو۔ سيمينار ۾ شاگردن، استادن، سول سوسائٽي جي نمائندن ۽ نوجوان اڳواڻن وڏي تعداد ۾ شرڪت ڪئي، پنهنجي اهم خطاب ۾ وائيس چانسلر پروفيسر ڊاڪٽر الطاف علي سيال چيو ته پاڪستان جو مستقبل اهڙي سماجي طور شامل ۽ بااختيار نوجوان نسل تي دارومدار رکي ٿو، جيڪو علم ۽ همدردي ذريعي جدت، امن ۽ پائيدار ترقي کي اڳتي وڌائي سگهي ٿو،هن چيو: “اسان جا گريجوئيٽس مستقبل جا اڳواڻ، جدت آڻيندڙ ۽ پاليسي ساز آهن۔ اسان جي ذميواري آهي ته کين علم، اعتماد ۽ مساوي موقعا ڏيون ته جيئن هو سنڌ ۽ پاڪستان جي ترقي ۾ اثرائتو ڪردار ادا ڪري سگهن، هن زور ڏنو ته سماجي شموليت جو مطلب اهو آهي ته سماج جي هر طبقي کي، جنس، علائقي يا معاشي پس منظر کان سواءِ، تعليم، موقعن ۽ فيصلا سازي ۾ برابر حصو ڏنو وڃي۔ هن وڌيڪ چيو ته يونيورسٽين کي گهرجي ته هو نوجوانن کي ذميوار شهري بڻائڻ ۾ اڳواڻ جو ڪردار ادا ڪن، جيڪي وائيي منڊل، برداشت ۽ جدت جا علمبردار هجن، ڊائريڪٽر يونيورسٽي ايڊوانسمينٽ اينڊ فنانشل اسسٽنس، پروفيسر ڊاڪٽر محمد اسماعيل ڪنڀر چيو ته نوجوانن کي بااختيار بڻائڻ صرف ڊگريون يا نوڪريون ڏيڻ تائين محدود ناهي، پر اهو انهن ۾ اعتماد، اخلاقيات ۽ زندگي جا مهارتون پيدا ڪرڻ جو عمل آهي، جيئن هو هڪ منصفاڻي ۽ خوشحال سماج جي تعمير ۾ سرگرم ڪردار ادا ڪري سگهن، هن چيو تہ سماجي شموليت صرف تعليم تائين رسائي جو نالو ناهي، پر اهو هر گريجوئيٽ ۾ اهو احساس پيدا ڪرڻ آهي ته هو قابلِ احترام، پراعتماد ۽ سماج ۾ فعال ڪردار ادا ڪرڻ جي صلاحيت رکي ٿو، هن وڌيڪ چيو ته صنفي برابري، محروم طبقن لاءِ شمولتي تعليم، ۽ نوجوانن جي فيصلا سازي ۾ شموليت امن ۽ پائيدار ترقي لاءِ انتهائي ضروري آهي۔ “جڏهن نوجوان سماجي، معاشي ۽ سياسي طور بااختيار ٿين ٿا، تڏهن قومون ترقي ڪن ٿيون، ۽ جڏهن انهن کي نظرانداز ڪيو وڃي ٿو ته معاشري ۾ افراتفري پيدا ٿئي ٿي، ان موقعي تي عامر بنگش ۽ ونود ڪمار چيو ته سماجي شموليت امتياز ۽ نابرابري خلاف هڪ ڊهال جو ڪم ڪري ٿي ۽ شاگردن ۾ همدردي ۽ شهري ذميواري جو جذبو پيدا ڪري ٿي۔ هنن نوجوانن تي زور ڏنو ته هو رضاڪاراڻي سرگرمين، ڪميونٽي سروس ۽ جدت تي ٻڌل منصوبن ۾ حصو وٺن، جيڪي سماجي ڀلائي ۾ مددگار ثابت ٿين، سيمينار ۾ شاگردن، استادن ۽ سول سوسائٽي جي نمائندن وڏي تعداد ۾ شرڪت ڪئي۔