ملير ۾ برسات جا ريڪارڊ ٽٽي پيا، غريب پورهيت جو گهر ڊهي پٽ

انڊسٽريل ايريا گهگهر جي کوسا ڳوٺ ۾ حيدر کوسو جو گهر ڊهي پٽ، گهرڀاتي معجزاڻي طور محفوظ

ملير (رپورٽ: عبدالرشيد مورجھريو) ملير ۾ تازين برساتن ماضي جا سڀ ريڪارڊ ٽوڙي ڇڏيا آهن، جنهن سبب ضلعي جي مختلف علائقن ۾ وڏيون تباهيون سامهون اچي رهيون آهن. انڊسٽريل ايريا گهگهر جي کوسا ڳوٺ ۾ غريب پورهيت حيدر کوسو جو گهر برسات دوران اوچتو ڊهي پيو. خوشقسمتيءَ سان سندس گهرڀاتي معجزاتي طور تي محفوظ رهيا، پر سڄو خاندان کليل آسمان هيٺ ويهي رهيو آهي.گهر مالڪ غلام حيدر کوسو ۽ سندس گهرواري ڪنول کوسو صحافين کي ٻڌايو ته برساتي پاڻي جي نيڪال جو ڪو به مناسب انتظام نه ٿيڻ سبب سندن گهر ڪريو آهي، جيڪا چونڊيل نمائندن جي سڌي نااهلي آهي. هنن ٻڌايو ته يونين ڪميٽي گهگهر جي چيئرمين کي مدد لاءِ اپيل ڪئي وئي پر ڪنهن به قسم جي سهائتا نه ملي. حيدر کوسو چيو ته هو غريب پورهيت آهي ۽ 7 معصوم ٻارڙن جو اڪيلو ڪفيل آهي، تنهنڪري حڪومت ۽ سماجي تنظيمن کان گهر ٻيهر ٺاهڻ لاءِ مدد جي اپيل ڪري ٿو ٻئي طرف وقفي وقفي سان هلندڙ برسات گهگهر ۽ ڀرپاسي جي علائقن ۾ وڏي تباهي مچائي ڇڏي آهي. روڊن ۽ رستن تي پاڻي گڏ ٿيڻ سبب عام زندگي مفلوج ٿي وئي آهي ۽ شهري سخت پريشانين کي منهن ڏئي رهيا آهن.