ملير: ڪلسٽر حب اسڪول ۾ شامل 26 اسڪولن جي هيڊ ٽيچرن جي تعارفي گڏجاڻي

ملير (رپورٽ: عبدالرشيد مورجھريو) گورنمينٽ بوائز سيڪنڊري اسڪول حاجي رکيو جوکيو ۾ ڪلسٽر ۾ شامل 26 اسڪولن جي هيڊ ٽيچرن جي پهرين تعارفي گڏجاڻي ٿي.گڏجاڻي جو مقصد ڪلسٽر سسٽم تحت تعليمي بهتري، انتظامي هم آهنگي ۽ اسڪولن جي ڪارڪردگي کي وڌيڪ مؤثر بڻائڻ هو.گڏجاڻي ۾ خالد جمعه جوکيو، ٽي اي او سيڪنڊري گڏاپ ٽائون، رضا بلوچ، ضلعي ڪوآرڊينيٽر آر ايس يو ملير، ثناءُالله جوکيو، پرنسپل گورنمينٽ هاءِ اسڪول ڪونڪر، اميرالدين جوکيو، هيڊ ماستر گورنمينٽ هاءِ اسڪول ڪونڪر، شير عالم جوکيو، هيڊ ماستر گورنمينٽ سيڪنڊري اسڪول حاجي سائين رکيو جوکيو، شاهنواز خاصخيلي، چيئرمين يو سي شاهه مريد، ۽ محمد رفيق جوکيو، وائيس چيئرمين يو سي شاهه مريد شرڪت ڪئي.ان موقعي تي مقررن تعليم جي اهميت، شاگردن جي حاضري، استادن جي ذميوارين، اسڪولن جي بنيادي سهولتن، ۽ ڪلسٽر سسٽم تحت گڏيل ڪوششن سان تعليمي معيار کي بهتر بڻائڻ تي تفصيلي روشني وڌي. ٽي اي او سيڪنڊري خالد جمعه جوکيو چيو ته ڪلسٽر سسٽم جو بنيادي مقصد وسيلن جو بهتر استعمال، اسڪولن وچ ۾ تعاون ۽ شاگردن کي معياري تعليم مهيا ڪرڻ آهي.ضلعي ڪوآرڊينيٽر آر ايس يو ملير رضا بلوچ چيو ته هيڊ ٽيچرن جو ڪردار انتهائي اهم آهي، ڇو ته سندن قيادت سان ئي اسڪولن ۾ تعليمي ماحول بهتر ٿي سگهي ٿو. هن اميد ظاهر ڪئي ته ڪلسٽر ۾ شامل سڀئي اسڪول گڏيل حڪمت عملي سان بهتر نتيجا حاصل ڪندا.آخر ۾ چيئرمين يو سي شاهه مريد شاهنواز خاصخيلي ۽ وائيس چيئرمين محمد رفيق جوکيو مقامي سطح تي تعليم لاءِ هر ممڪن سهڪار جي خاطري ڪرائيندي چيو ته تعليم ئي علائقي جي ترقي جو واحد ذريعو آهي.گڏجاڻي ۾ ڪلسٽر ۾ شامل سمورن 26 اسڪولن جي هيڊ ٽيچرن ڀرپور شرڪت ڪئي ۽ مستقبل ۾ باقاعده گڏجاڻيون ڪرڻ تي به اتفاق ڪيو ويو.