سگا ڪراچي برانچ جي نئين چونڊيل باڊي جي تعارفي گڏجاڻي

هن وقت سنڌ ۾ ڪيترائي مسئلا آهن جنهن لاءِ اسان کي جدوجهد ڪرڻي پوندي، تعليم ۾ اسان کي اڳتي وڌڻو آهي:مقرر

ڪراچي (رپورٽر) سنڌ گريجوئيٽس ايسوسئيشن ڪراچي مدر برانچ جي نئين چونڊيل باڊي جي تعارفي تقريب منقعد ڪئي وئي. پروگرام ۾ آيل مهمانن کي اجرڪ پارايا ويا ۽ کين سگا جا بيج لڳايا ويا. تقريب ۾ سنڌ گريجوئيٽس ايسوسئيشن جي باني محمد سليمان شيخ، اڳوڻي وفاقي وزير مدد علي سنڌي، سنڌ گريجوئيٽس ايسوسئيشن ڪراچي جي صدر اي بي لاشاري، فتح محمد کهاوڙ، اشرف علي، ڊاڪٽر يار محمد کهاوڙ، يونس مهر ۽ وڪيلن، صحافين، ليکڪ، مختلف مڪتب فڪر سان تعلق رکندڙ سنڌ سگا جي ميمبرن شرڪت ڪئي. ان موقعي تي تقريب کي خطاب ڪندي محمد سليمان شيخ چيو ته نئين چونڊيل باڊي کي خوش آمديد چئون اسان کي يقين آهي ته نيئن چونڊيل باڊي پنهجو ڪم ڀرپور نموني ڪندا، اوهان سڀئي دوست ان ۾ سهڪار ڪندا، سگا جا جا روشن تارا اسڪول بهترين اسڪول ٿين، اميد آهي ته اسان اڃا وڌيڪ بهتر ڪم ڪندا رهون، هن وقت سنڌ ۾ ڪيترائي مسئلا آهن جنهن لاءِ اسان کي جدوجهد ڪرڻي پوندي، تعليم ۾ اسان کي اڳتي وڌڻو آهي، ڇو ته اسان جو هڪ شاندار ماضي آهي، سرڪاري ادارا جيڪي به آهن اهي اسان جا انهن جي اسان مالڪي ڪرڻ گهرجي. اڳوڻي وفاقي وزير مدد علي سنڌي چيو ته سنڌ گريجوئيٽس ايسوسئيشن خاص فعال تنظيم آهي، نئين چونڊيل باڊي جي صدر اي بي لاشاري هڪ محنتي جفاڪش ماڻهو آهي، سنڌ گريجوئيٽس ايسوسئيشن سنڌ جي حقن لاءِ جدوجهد ڪئي آهي، مون اڄ سگا جي دوستن آڏو اها ڳالھھ چئي آهي ته اسلام آباد ۾ هاسٽل آهي شاگردن ۽ شاگردياڻين اهڙي طرح ڪراچي ۾ به هڪ هاسٽل شاگردن شاگردياڻين لاءِ ٺهرائڻ گهرجي جئين ڪراچي ۾ ٻين شهرن جا شاگرد اچن ٿا آهي اتي رهي سگهن، ان لاءِ اسان کي چندو گڏ ڪرڻو پوي يا حڪومت کان فنڊ وٺڻو پوي پر ڪراچي ۾ هاسٽل ٺهرائڻي آهي. هن وڌيڪ چيو ته اسان کي ڪراچي ۾ شاھ لطيف هال ٺهرائڻ گهرجي، ماڻهن کي ووٽ ڏيندڙن کان سول ڪرڻ گهرجي. سگا ڪراچي جي نيئن چونڊيل صدر اي بي لاشاري چيو ته سنڌ گريجوئيٽس ايسوسئيشن سماجي لحاظ کان سنڌ جي وڏي تنظيم آهي، سگا ايڪٽو ڪجي ته سماجي توڙي سياسي تمام وڏو رول ادا ڪري سگهي ٿي، سگا جا روشن تارا اسڪول ڪجهه جڳهن تي آهن اسان اها ڪوشش ڪنداسين ته هر تعلقي ۾ اسڪول کوليا وڃن، اسان جو ملڪ زرعي ملڪ هن تي زراعت سان منسلڪ اسڪلس تي ڪم ڪيو وڃي اسان کي خام مال ٻاهران گهرائڻ ضرورت ناهي زراعت مان پيدا ٿيندڙ خام مال تمام بهترين نموني سان فيڪٽري جوڙي ڪري اسان پنهنجي عام ماڻهو کي روزگار ملي سگهي، اسان اهو ٿا چئون ته اسان ماڻهن کي مانيون نه کارايو ڪپڙا نه ڏيو بلڪ انهن ماڻهن کي ڪپڙا ٺاهڻ سيکاريو ۽ انهن کي مڇي پڪڙڻ سيکاريون اهو اسان جو پيغام آهي، اسان لائيف ٽائيم اچيو مينٽ ايوارڊ سگا جي باني محمد سليمان شيخ کي ڏينداسين، سگا پاران بهترين ڪم ڪندڙ شخصيتن کي ايوارڊ ڏنا وڃن، سگا سنڌ جو هڪ خدمتگار ادارو آهي، سگا جي تاريخ رهي آهي ته خاص ڪري علم، ادب ۾ تمام گهڻيون خدمتون آهن.