ملڪ جي ھڪ پاسي کي آباد ڪري، ٻي کي ويران ۽ ڀڙڀانگ ڇو ٿا ڪرڻ چاھيو؟: اياز لطيف پليجو

حيدرآباد (بيورو)قومي عوامي تحريڪ جي سربراھ اياز لطيف پليجي چيو تہ ملڪ جي ھڪ پاسي کي آباد ڪري، ٻي کي ويران ۽ ڀڙڀانگ ڇو ٿا ڪرڻ چاھيو؟ سڄي دنيا جا ماڻھو طويل دريائن تي گڏجي آباديون ڪن ٿا، اوھان اڪيلي سر ھڪ سڄو درياءُ ڇو ٿا روڪڻ ۽ چورائڻ چاھيو؟ اياز لطيف پليجي چيو تہ اريگيشن کاتي کي مال غنيمت ڪري لٽيو ويو آھي. بئراجن جي صفائي، مرمت، بند مضبوط ڪرڻ، واھن، شاخن ۽ سم نالين جي کاٽي جي نالي ۾ اربين روپين جي ڪرپشن ڪري سنڌ جي دولت ٻاھرين ملڪن ڏانھن منتقل ڪئي وئي آھي. اياز لطيف پليجي چيو تہ خراب حڪمراني ۽ ڪرپشن جي ڪري سنڌ ترقي ۾ باقي صوبن کان پوئتي رھجي وئي آھي. قبيلائي جھيڙا ۽ بدامني ناسور بنجي ويا آھن. جيڪي ماڻھو اغوا ٿين ٿا اھي ڀنگ ڀري بازياب ٿين ٿا. سنڌ حڪومت وڏيرن، سردارن، جاگيردارن، ڏوھارين جي سرپرست بنيل آھن. منشيات جو زھر نوجوانن ۽ ٻارن کي تباھ ڪري رھيو آھي. اياز لطيف پليجي چيو تہ سنڌ حڪومت سنڌ کي تباھ ۽ برباد ڪري ڇڏيو آھي. خوشحال سنڌ جا ماڻهو عذاب واري زندگي گذاري رهيا آهن پيپلزپارٽي سنڌي ماڻهن کي پنھنجو غلام سمجھي ٿي ھي صرف اقتدار حاصل ڪرڻ لاء عوام دوستي جو ڪوڙو نعرو ھڻي ماڻهن کي بيوقوف بڻائي ٿي. پيپلزپارٽي کي نہ سنڌين سان پيار آهي نہ سنڌين کان خوف آهي. سنڌ جي تباهي جي ذميوار پيپلزپارٽي مراد علي شاھ ۽ سندس ڪرپٽ سنڌ ڪابينا آهي.