ملير ۾ نوجوان جا قاتل گرفتار نه ٿيڻ خلاف وارثن جو احتجاجي مظاهرو

اسان جي نوجوان کي بيگناهه قتل ڪيو ويو، پوليس سندس قاتلن کي گرفتار نٿي ڪري: مظاهرين

ملير (رپورٽ: عبدالرشيد مورجھريو) ڇهه مهينا اڳ بي دردي سان قتل ڪيل 22 سالن جي نوجوان فياض کوسو جا قاتل گرفتار نه ٿيا، نوجوان جو پي ۽ امڙ جي اڳواڻي ۾ وارثن جو احتجاجي مظاهرو ۽ ڌرڻوقاتل گرفتار ڪريو جا نعرا ، پورهيت ماڻهو آهيون اسان جي نوجوان کي بيگناهه قتل ڪيو ويو آهي، جاچ پوليس رشوت عيوض ڪيس لوڙهڻ چاهي ٿي، اعليٰ اختياريون نوٽيس وٺي انصاف ڪن،وارثڻ جون صحافين سان ڳالهيون، تفصيل موجب ملير جي علائقي ڪوهي ڳوٺ ۾ ڇهه مهينا اڳ 22 سالن جي نوجوان فياض کوسو جي بيگناهه قتل ۾ ملوث قاتل گرفتار نه ڪرڻ خلاف نوجوان جي وارثن ۽ علائقي واسين مقتول جي والده جي اڳواڻي ۾ عوامي پريس ڪلب ملير جي اڳيان احتجاجي مظاهرو ڪري ڌرڻو هڻي سخت نعريبازي ڪئي، سندن هٿن ۾ بينر ۽ پلي ڪارڊ هئا، ان موقعي تي مقتول جي والد واحد بخش، عبدالشڪور، خان محمد، سڪندر بروهي، منٺار علي جوڳي، شعبان، جوڳي ۽ ٻين صحافين اڳيان دانهيندي چيو ته اسان مسڪين ۽ پورهيت ماڻهو آهيون، اسان جي نوجوان کي بيگناهه قتل ڪيو ويو آهي، اسان ڪيترائي ڀيرا لاڳاپيل اختيارين کي درخواستون ڏنيون پر قاتلن جي گرفتاري لاءِ اڃا تائين ڪا به اڳڀرائي نه ٿي سگهي آهي، جيڪا مقتول جي وارثن سان کليل زيادتي ۽ انصاف جي لتاڙ آهي، هنن چيو ته شاهه لطيف ٿاڻي جي جاچ پوليس جو آفيسر اصغر شيخ قاتل کان رشوت وٺي خون لوڙهڻ چاهي ٿو، هنن چيو ته جوابدارن شعيب، الاهي بخش، ناظم، پرويز، شاهه حسين، امجد ۽ سراج بروهي اسان جي نوجوان فياض کوسو کي قتل ڪيو ۽ ٻن همراهن خان محمد ۽ عبدالشڪور کي مرڻينگ ڪري ڇڏيو، تنهن هوندي جاچ پوليس کين گرفتار نه پئي ڪري ۽ رعايت ڏئي رهي آهي، هنن سنڌ جي وڏي وزير، صوبائي وزير داخلہ ۽ آءِ جي سنڌ کان مطالبو ڪيو ته فوري طور نوٽيس وٺي جوابدارن کي گرفتار ڪري کين عبرتناڪ سزا ڏني وڃي ته جيئن مستقبل ۾ اهڙا واقعا رونما نه ٿين.