اياز لطيف پليجي ملڪ جي ڪا به يونيورسٽي عالمي معيار جي نه ھجڻ تي افسوس جو اظھار

حيدرآباد (بيورو)قومي عوامي تحريڪ جي سربراھ اياز لطيف پليجي ملڪ جي ڪا بہ يونيورسٽي عالمي معيار جي نہ ھجڻ تي افسوس جو اظھار ڪندي چيو آھي تہ تعليم، سائنس ۽ ترقي حڪمرانن جي ايجنڊا ناھي. ڪرپشن، ڦرلٽ، انساني حقن جون ڀڃڪڙيون ۽ ملڪ دشمن پاليسيون جوڙڻ دستور بنجي ويو آھي. مسلسل خراب حڪمراني ملڪ کي ديوار سان لڳائي ڇڏيو آھي. موجوده حڪمران پھريون ڀيرو اقتدار ۾ ناھن آيا، آھي ڪيترن ئي ڏهاڪن کان بار بار مسلط ڪيا وڃن ٿا، جنھن جو نتيجو آھي جو دنيا جي ٽاپ 350 يونيورسٽين ۾ پاڪستان جي هڪ بہ يونيورسٽي شامل ناهي. اياز لطيف پليجي چيو تہ ملڪ ۾ موجود يونيورسٽين ۽ تعليمي نظام جو سنڌ ۾ وڌيڪ ٻيڙو ڀڏل آھي. پنجاب ۽ اسلام آباد جون يونيورسٽيون ۽ اتي جو تعليمي نظام سنڌ کان تمام گھڻو بھتر ۽ اڳتي آھي. اياز لطيف پليجي چيو تہ سنڌ ۾ ھزارين اسڪول بند پيا آھن. يونيورسٽيز مان شاگردياڻين جا لاش ملن ٿا. سھولتون ناھن. تعليمي معيار ناھي. شاگرد ناانصافين جو شڪار آھن. ڪرپشن ۽ بدعنواني يونيورسٽين ۽ ڪاليجن جو ٻيڙو غرق ڪري ڇڏيو آھي. اياز لطيف پليجي چيو تہ سنڌ جا شاگرد پڙھڻ چاھين ٿا پر انھن لاء معياري لائبرريون ناھن. جيڪي لائبريريون موجود آھن انھن ۾ شاگردن جي ويھڻ جي گنجائش ناھي. اياز لطيف پليجي چيو تہ سنڌ ڌاڙيل راڄ آھي. ھڪڙا ڌاڙيل سکر، لاڙڪاڻو ڊويزن ۾ ماڻھو اغوا ڪن ٿا. قتل ڪن ٿا ۽ ٻيا ڌاڙيل سنڌ جي دولت لٽي رھيا آھن. ڪرپشن ڪري رھيا آھن. وسيلن جي ڀينگ ڪري رھيا آھن. ان جي ڀيٽ ۾ سنڌ ۾ بک، بدحالي ۽ بيروزگاري آھي. صحت جون سهولتون ناھن. تعليمي نظام درھم برھم آھي. روڊ ٽٽل آھن. پيئڻ جو صاف پاڻي ناھي. 18 سالن کان ھلندڙ خراب حڪمراني سنڌ کي پوئتي ڌڪي ڇڏيو آھي.