چوهڙ جمالي ۾ مڙس جي مبينا تشدد ۾ مارجي ويل ناري جي وارثن جو سجاول ۾ احتجاج

سجاول ( رپورٽر ) ڪجه ڏينهن اڳ چوهڙ جمالي ۾ مڙس هٿان تشدد ۾ فوت ٿيل ناري جي وارثن پاران موتمار ڌمڪين خلاف احتجاج، انصاف جي گهر، ڪجه ڏينهن اڳ چوهڙ جمالي شهر ۾ مڙس هٿان مبينه تشدد ۾ فوت ٿيل ناري ظهره خاصخيلي جي وارثن پيءُ جڙيو خاصخيلي ۽ ماءُ فاطمه خاصخيلي سورج سجاولي پريس ڪلب آڏو احتجاج ڪندي صحافين اڳيان ڳالهائيندي چيو ته اسان جي 22 سالا ڌيءَ ظهره خاصخيلي جنهن کي سندس مڙس عمران خاصخيلي ظالماڻو ۽ وحشياڻو تشدد ڪري مرڻ جوڳي حالت ۾ چوهڙ جمالي اسپتال کڻي آيو جتي وڌيڪ نازڪ حالت هجڻ ڪري مڪلي اسپتال آندو ويو جتي هو زخمن جا سور نه سهندي فوت ٿي وئي. اهڙي قتل ڪيس جي ايف آئي آر اسان جوابدار ناٺي عمران خاصخيلي خلاف چوهڙ جمالي ٿاڻي تي داخل ڪرائي آهي پر جوابدار عمران خاصخيلي ۽ ان جا وارث ارشاد خاصخيلي، اڪو خاصخيلي صدام خاصخيلي وارا اسان کي ڪيس تان هٿ کڻائڻ لاءِ موتمار ڌمڪيون ڏئي رهيا آهن. ۽ چئي رهيا آھن ته ڪيس تان هٿ کڻو نه ته اسان اوهان جو ٻيو به ماڻھو مارينداسين. مقتولا ناري جي وارثن آئي جي سنڌ، ڊي آئي جي حيدرآباد ۽ ايس ايس پي سجاول کي اپيل ڪئي آهي ته اسان غريب مسڪين آهيون اسان جي نياڻي کي بيگناه تشدد ڪري گلي ۾ گهٽا ڏئي قتل ڪيو ويو آهي جوابدار عمران خاصخيلي کي سخت کان سخت سزا ڏئي اسان جي نياڻي سان انصاف ڪيو وڃي.