ڪلچر کاتو سنڌي فنڪار جي مالڪي ڪري، ٻي صورت ۾ رستن تي نڪرنداسين:ايوب گل

پاڻي هاڻ سر کان مٿي نڪري چڪو آهي(نسرين ناز) ڪراچي آرٽس ڪائونسل جي فنڊن جو آڊٽ ڪرائي وڃي:منور جوڻيجو

ڪراچي (رپورٽر)ڪراچي ۾ ميلوحا آرٽ سرڪل جي اهم گڏجاڻي منعقد ٿي، جنهن جي صدارت مرڪزي صدر ۽ نامور ليکڪ ايوب گل ڪئي۔ گڏجاڻي ۾ فن، فنڪار ۽ سنڌي ٻوليءَ کي قومي سطح تي جائز مقام ڏيڻ لاءِ اهم فيصلا ڪيا ويا۔ گڏجاڻي ۾ فيصلو ڪيو ويو ته ثقافت کاتي کي تفصيلي يادداشت نامو پيش ڪيو ويندو، جنهن ۾ سنڌي فن ۽ فنڪارن سان لاڳاپيل اهم مطالبا شامل آهن۔ ڪراچي آرٽس ڪائونسل جي انتظاميا کي خط ذريعي سنڌي فنڪارن لاءِ باقاعده ميمبرشپ، "ٿر لاڙ ۽ ڪاڇو ڊراما فيسٽيول" ۽ آرٽس ڪائونسل جي ڪنهن وڏي هال کي سنڌ جي عظيم شخصيت سان منسوب ڪرڻ جو مطالبو ڪيو ويندو۔ جيڪڏهن عالمي سنڌي ٻولي ڪانفرنس ڪراچي ۾ ڪوٺائي نه وئي ته ميلوحا آرٽ سرڪل احتجاجي تحريڪ شروع ڪندو۔ پي ٽي وي ۽ ريڊيو پاڪستان ڪراچي تان سنڌي ٻولي ۽ فنڪارن کي نيڪالي ڏيڻ خلاف به منظم جدوجهد هلائي ويندي۔ ايندڙ هفتي ۾ ميلوحا جو وفد سڀني لاڳاپيل ادارن سان ملاقاتون ڪري پنهنجي احتجاج جو رڪارڊ ڪرائيندو۔ گڏجاڻي ۾ ٽي وي ۽ اسٽيج جي نامور فنڪارن ۽ ليکڪن شرڪت ڪئي، جن ۾ سينيئر اداڪارا نسرين ناز، شميم شيخ، فضا ملڪ، ثنا رضا، اينڪر سهڻي پارس، شاعر ۽ مزاح نگار منور جوڻيجو، پروڊيوسر ڊائريڪٽر آصف علي ڀٽو، سنگر شان ڏهر، ڊراما ڊائريڪٽر حسين شيخ ۽ صابر قريشي شامل هئا۔انهي موقعي تي سينئر اداڪارا نسرين ناز چيو "پاڻي هاڻ سر کان مٿي نڪري چڪو آهي، جيڪڏهن ثقافت وارو وزير جائز مطالبا نه مڃيندو ته ڪلچر کاتي جي آفيس آڏو ڌرڻو هنبو۔ سنڌي فنڪار ڪمزور نه آهن، اسان پنهنجا حق ڇنڻ ڄاڻون ٿا۔" منور جوڻيجو چيو "ڪراچي آرٽس ڪائونسل جي گذريل ٽن سالن جي فنڊن جو آڊٽ ڪرائي ڏسجي ته خبر پوندي فن لاءِ ڪيترو ۽ ڪيئن استعمال ٿيو۔ اسان جو وڏو مطالبو عالمي سنڌي ڪانفرنس ۽ سنڌي ثقافت کي ورلڊ ڪلچر فيسٽيول ۾ مناسب نمائندگي آهي۔" شميم شيخ چيو "سنڌي فنڪار کي ننڍو سمجهي هر وقت تذليل ڪئي وڃي ٿي، جيڪا هاڻ ڪنهن صورت برداشت نه ٿيندي۔" ثنا رضا چيو "صرف آرٽس ڪائونسل ۽ ڪلچر کاتو ئي نه پر پي ٽي وي به سنڌي پروگرام ختم ڪري فنڪارن سان ناانصافي ڪري رهيو آهي۔" فضا ملڪ خبردار ڪيو "ثقافت کاتي پنهنجي رويو ۾ سڌارو نه آندو ته اسين سندن آفيسن اندر وڃي ڌرڻا هڻنداسين۔" هدايتڪار حسين شيخ چيو "پي ٽي وي وٽ اردو، پنجابي ۽ پشتو لاءِ وسيلا آهن، پر سنڌي ٻولي انهن جي اک جو ڪنڊو بڻجي چڪي آهي۔" صابر قريشي چيو "اسان هاڻ پي ٽي وي ۽ ريڊيو پاڪستان جو گهيراءُ ڪنداسين، دما دم مست قلندر واري تحريڪ شروع ٿيندي۔" سهڻي پارس چيو "اسان کي هاڻ صرف آسرن ۽ دلاسن تي چپ نه ويهڻو پوندو، عملي جدوجهد ضروري آهي۔" مرڪزي صدر ايوب گل گڏجاڻي کي خطاب ڪندي چيو "ميلوحا آرٽ سرڪل جي پليٽفارم تان صاف پيغام آهي ته ڪلچر کاتو سنڌي فنڪار جي مالڪي ڪري۔ واهرو کي ويري نه بڻايو وڃي۔ ثقافت وارو وزير ۽ ڊي جي مهرباني ڪري سنڌي فنڪار کي عزت سان انسان سمجهن۔" هن وڌيڪ مطالبو ڪيو ته انڊومينٽ ڪاميٽي مان بي دخل ڪيل اسحاق سميجو ۽ لاڙڪاڻي آرٽس ڪائونسل جي صدر کي فوري طور تي بحال ڪيو وڃي۔ سينيئر اداڪارا نسرين ناز کي به اداڪارن جي نمائندگي طور ڪاميٽي ۾ شامل ڪيو وڃي۔ ايوب گل خبردار ڪيو "اسان يادداشت نامو ڏيڻ کان پوءِ سندن در تي وڃڻ بدران سڌو رستن تي نڪرنداسين۔ سڄي سنڌ ۾ ڌرڻا ۽ مظاهرا شروع ڪيا ويندا۔"