سنڌ حڪومت هنگامي صورتحال کي منهن ڏيڻ لاءِ تيار آهي: مڪيش ڪمار چاولا

پنجند کان ايندڙ پاڻي شام تائين سنڌ ۾ داخل ٿيندو، جنهن کان پوءِ صورتحال وڌيڪ واضح ٿي ويندي

شڪارپور (احسان ابڙو ) سنڌ حڪومت سيلابي صورتحال کي منهن ڏيڻ لاءِ تيار، مڪيش ڪمار چاولا جي ميڊيا بريفنگ تفصيل موجب اڄ شڪارپور ۾ سيلابي صورتحال بابت صوبي جي وزير ايڪسائيز اينڊ ٽيڪسيشن ۽ سنڌ حڪومت طرفان مقرر ڪيل ايمرجنسي فوڪل پرسن مڪيش ڪمار چاولا چيو آهي ته سنڌ حڪومت هر ممڪن هنگامي صورتحال کي منهن ڏيڻ لاءِ مڪمل طور تي تيار آهي. هن اها ڳالهه شڪارپور ۾ ميڊيا کي بريفنگ ڏيندي ڪئي. مڪيش ڪمار چاولا چيو ته پنجند کان ايندڙ پاڻي شام تائين سنڌ ۾ داخل ٿيندو، جنهن کان پوءِ صورتحال وڌيڪ واضح ٿي ويندي. هن ٻڌايو ته ضلعي ۾ ٻئي ڏينهن پڻ اعليٰ سطحي اجلاس ڪوٺايو ويو جنهن ۾ صحت ۽ لائيو اسٽاڪ جي سهولتن سان گڏ متاثر خاندانن جي بروقت ريسڪيو ۽ امداد لاءِ جامع پلان تيار ڪيو ويو آهي. هن وڌيڪ چيو ته ضلعي جي مختلف هنڌن تي 30 رليف ڪيمپون قائم ڪيون ويون آهن، جتي متاثر خاندانن کي رهائش، خوراڪ ۽ علاج جون سهولتون فراهم ڪيون پيون وڃن. جڏهن⁠ ته آبپاشي کاتي جو عملو به دريائي بندن جي نگراني تي مقرر آهي، جيئن ڪنهن به ممڪن خطري کي وقت سر روڪي سگهجي. اجلاس ۾ صوبائي وزير مڪيش ڪمار چاولا سان گڏ ، ايم پي اي محمد عارف خان مھر، صوبائي صلاحڪار بابل ڀيو، ڊسٽرڪٽ ڪائونسل چيئرمين ذوالفقار خان ڪماريو، ايم پي اي امتياز شيخ ،ڊپٽي ڪمشنر شڪارپور شڪيل احمد ابڙو، ايس ايس پي شاهزيب چاچڙ، صوبائي مشيرن ۽ لاڳاپيل کاتن جي اعليٰ عملدارن پڻ شرڪت ڪئي. اجلاس ۾ فيصلو ڪيو ويو ته امن امان قائم رکڻ لاءِ خاص حڪمت عملي اختيار ڪئي ويندي ۽ سڀني ادارن کي واضح هدايتون جاري ڪيون ويون آهن۔