پيپلزپارٽي هميشه عوام جي خدمت کي اولين ترجيح ڏني آهي : راول شرجيل ميمڻ

اسان جو تڪ ترقياتي ڪمن جي حوالي سان ماڊل تڪ رهيو آهي جتي عوامي ڀلائيءَ جا ڪيترائي منصوبا مڪمل ڪيا ويا آهن

حيدرآباد (بيورو)سينيئر صوبائي وزير اطلاعات، ٽرانسپورٽ ۽ ماس ٽرانزٽ شرجيل انعام ميمڻ جي خاص هدايت تي پاڪستان پيپلزپارٽيءَ جي نوجوان اڳواڻ راول شرجيل ميمڻ اڄ ٽنڊي ڄام ۾ ميڊيا سان ڳالهائيندي چيو ته پاڪستان پيپلزپارٽي هميشه عوام جي خدمت کي اولين ترجيح ڏني آهي . هن چيو ته سندن حلقو ترقياتي ڪمن جي حوالي سان هڪ ماڊل حلقو رهيو آهي جتي عوامي ڀلائيءَ جا ڪيترائي اهم منصوبا مڪمل ڪيا ويا آهن. راول شرجيل ميمڻ ٻڌايو ته هن مهل تائين ڪيتريون ئي پيوَر بلاڪ جون اسڪيمون ڏنيون ويون آهن، جن جو مقصد بنيادي ڍانچي کي بهتر بڻائڻ آهي. هن چيو، "اسان جي فیز ون ۾ 9 لک پيوَر بلاڪ ورهايا ويا هئا ۽ فیز ٽو ۾ وڌيڪ 10 لک پيوَر بلاڪ ڏنا ويا آهن، جڏهن ته ٽئين مرحلي ۾ به 10 لک پيور بلاڪ فراهم ڪيا ويندا، ته جيئن ترقياتي ڪمن جو سلسلو جاري رهي. هن ٻڌايو ته پيوَر بلاڪ جي مدد سان انهن ڳوٺن ۾ جتي ترقياتي ضرورتون تمام گهڻيون آهن، اتي روڊن جي توسيع ۽ نون روڊن جي تعمير ڪئي پئي وڃي. هن چيو ته اسان جي تڪ ۾ ڪو به اهڙو ڳوٺ ناهي جتي پاڪستان پيپلزپارٽي جي صوبائي حڪومت ڪم نه ڪيو هجي. راول شرجيل ميمڻ ٻڌايو ته پي ايس 61 ۾ تقريباً 850 ڳوٺ شامل آهن، جتي لائبريري، پيپلز هائوسنگ پروجيڪٽ، بينظير انڪم سپورٽ پروگرام ۽ ماڊل ٽائون بہاول زئنور ڳوٺ ۾ ترقياتي ڪم ڪرايا ويا آهن. هن چيو ته قدرتي آفتن دوران پيپلز پارٽي جا نمائندا هميشه پنهنجي عوام سان گڏ هوندا آهن ۽ هر قسم جي مدد فراهم ڪرڻ لاءِ پنهنجو ڪردار ادا ڪندا آهن ته جيئن آفتن سبب متاثر ٿيل علائقن جي جلد بحالي ٿئي. راول شرجيل ميمڻ عوام کان اپيل ڪئي ته اهي ترقياتي ڪم جي حوالي سان حڪومت جي قدمن کي سمجهن ۽ پارٽي جي پروگرامز ۾ مڪمل سهڪار ڪن، جيئن سنڌ ۽ حيدرآباد جي عوام کي بهتر سهولتون فراهم ڪري سگهجن. ان موقعي تي پاڪستان پيپلزپارٽي جي مقامي اڳواڻن ۽ معزز شخصيتن پڻ سندن ساڻ هئا.