سجاول ۾ ضلعي انتظاميه پاران ڪشمير ڊي جي حوالي سان ريلي

محمد پيرل چانڊيو جي اڳواڻي ۾ ڊي سي آفيس کان هڪ شاندار ريلي ڪڍي وئي

سجاول (رپورٽر) ضلعي انتظاميا سجاول پاران مقبوضه ڪشمير ۾ ڀارتي ظلم ۽ جبر خلاف ۽ ڪشميري عوام سان يڪجهتي جي اظهار لاءِ ايڊيشنل ڊپٽي ڪمشنر ٽو محمد پيرل چانڊيو جي اڳواڻي ۾ ڊي سي آفيس کان هڪ شاندار ريلي ڪڍي وئي. ريلي ۾ روينيو، تعليم، صحت، پوليس، سوشل ويلفيئر، لوڪل گورنمينٽ ۽ ٻين کاتن جي آفيسرن ۽ عملي، استادن، صحافين، سول سوسائٽي، مختلف اين جي اوز جي نمائندن سميت عوام جي وڏي انگ شرڪت ڪئي. ريلي جي شرڪت ڪندڙن هٿن ۾ بينر ۽ ڪشميري جهنڊا کڻي ڪشميري عوام سان يڪجهتي جو اظهار ڪيو ۽ ڀارتي جبر خلاف سخت نعريبازي ڪئي. ان موقعي تي خطاب ڪندي ايڊيشنل ڊپٽي ڪمشنر ٽو محمد پيرل چانڊيو چيو ته مقبوضه ڪشمير جي تاريخ ڀارت جي غيرقانوني قبضي ۽ مظلوم ڪشميرين تي ظلم ۽ ستم سان ڀريل آهي، پر ڀارت 5 آگسٽ 2019ع تي غيرقانوني ۽ غيرآئيني قدم کڻي مقبوضه ڪشمير جي خصوصي حيثيت ختم ڪئي، جيڪو نه رڳو قابلِ مذمت آهي پر گڏيل قومن جي قراردادن جي به ڀڃڪڙي آهي. هن وڌيڪ چيو ته رياستي جبر ۽ تشدد ذريعي ڪشميرين کي سندن بنيادي حقن کان محروم نٿو ڪري سگهجي. پاڪستاني فوج، عوام ۽ ملڪ جو هر ٻار ڪشميري عوام سان گڏ بيٺل آهي ۽ هر فورم تي سندن حمايت جاري رکي ويندي. هن گڏيل قومن ۽ عالمي برادري کان مطالبو ڪيو ته اهي ڪشميرين جي حقِ خوداراديت ۽ انساني حقن جي تحفظ کي يقيني بڻائين ۽ گڏيل قومن جي قراردادن تي عمل ڪندي ڪشمير مسئلي کي جلد کان جلد حل ڪن.ٻي طرف ٽائون ڪميٽي سجاول پاران ڪشميرين سان يڪجھتي ۽ والاريل ڪشمير ۾ ڀارتي ظلم خلاف ٽائون ڪميٽي سجاول پاران مامون لاڏو چوڪ کان پبلڪ پارڪ تائين هڪ شاندار ريلي ڪڍي وئي ريلي ۾ سول سوسائٽي ۽ مختلف انساني حقوق تنظمين ۽ صحافين ٽائون ڪميٽي عملدارن شرڪت ڪئي ريلي ۾ شرڪت ڪندڙن هٿن ۾ بينر ۽ ڪشميري جھنڊا کڻي ڪشمرين سان يڪجھتي جو اظھار ڪيو جڏهن ته ڀارتي ظلم خلاف سخت نعري بازي ڪندي احتجاج پڻ ڪيو ويو ان موقعي تي عبدالحميد کٽي , عبدالرشيد ميمڻ , بشير ملاح , زاهد مينڌرو , غلام حسين ميربحر , عبدالغني سھتو شاد رزاق ميمڻ چيو ته والاريل ڪشمير جي تاريخ ڀارتي غير قانوني قبضي ۽ مظلوم ڪشميرن تي ڪيل ظلم سان ڀريل آهي پر ڀارت 5 آگسٽ 2019 تي هڪ غيرقانوني ۽ غير آئيني قدم کڻي والاريل ڪشمير جي خصوصي حيثيت ختم ڪئي جيڪا نه رڳو قابل مذمت پر گڏيل قومن جي قراردار جي خلاف سخت ورزي پڻ آهي