ملير ۾ ڌار ڌار ٽريفڪ حادثا، معصوم ٻار سميت2ڄڻا فوت، هڪ نوجوان زخمي

ملير (رپورٽ: عبدالرشيد مورجھريو) ملير جي مختلف علائقن ۾ پيش آيل ٻن ڌار ڌار ٽريفڪ حادثن ۾ معصوم ٻار سميت ٻه ڄڻا ڄڻا فوت ٿي ويا جڏهن ته هڪ نوجوان زخمي ٿي پيو جنهن سبب علائقي ۾ سوڳ جي فضا ڇانئجي وئي پهريون واقعو اسٽيل مل چورنگي ڀرسان پيش آيو، جتي نامعلوم گاڏي موٽر سائيڪل کي زور دار ٽڪر هنيو. حادثي جي نتيجي ۾ موٽر سائيڪل تي سوار هڪ نوجوان موقعي تي ئي فوت ٿي ويو،جڏهن ته ٻيو نوجوان معمولي زخمي ٿيو. فوت ٿيل نوجوان جي سڃاڻپ فيضان ولد اڪمل عمر 22 سال جڏهن ته زخمي نوجوان جي سڃاڻپ عرفان ولد عبدالصمد عمر 20 سال طور ٿي آهي. حادثي کان پوءِ فوتي ۽ زخمي کي فوري طور جناح اسپتال منتقل ڪيو ويو. پوليس موجب حادثي جو سبب بڻجندڙ گاڏي موقعي تان فرار ٿي وئي، جنهن جي ڳولا ۽ وڌيڪ جاچ جاري آهي.ٻيو افسوسناڪ حادثو شاهه لطيف ٽائون جي سيڪٽر 19/B ڀرسان پيش آيو، جتي تيز رفتار ٽرڪ جي ٽڪر سبب هڪ راهگير معصوم ٻار موقعي تي ئي فوت ٿي ويو. فوت ٿيل ٻار جي سڃاڻپ فرحان ولد آصف عمر 13 سال طور ٿي آهي. اطلاع ملڻ تي پوليس موقعي تي پهچي ٻار جو لاش قانوني ڪارروائي لاءِ اسپتال منتقل ڪيو، جڏهن ته ٽرڪ کي تحويل ۾ وٺي وڌيڪ جاچ شروع ڪئي وئي آهي. عيندي شاهدن موجب ٽرڪ تيز رفتاري سبب بي قابو ٿي ٻار کي لتاڙي نڪري ويو.