حڪومت جون پاليسيون ملڪ کي وڌيڪ بحرانن ۾ وجھي رھيون آھن، پاڻي تي ڌاڙي جي مزاحمت ڪنداسين: اياز لطيف پليجو

سنڌو درياھ تي ڌاڙا ھڻي پاڻي چوري ڪيو وڃي ٿو. سنڌ کي پنھنجي حصي جو پاڻي نٿو ڏنو وڃي

حيدرآباد(بيورو) قومي عوامي تحريڪ جي سربراھ اياز لطيف پليجي وفاقي حڪومت پاران ٻيهر تڪراري سنڌ دشمن ڪئنالن جي اڏاوت ۽ چناب تي ٽن ڊيمن جي غير قانوني پي سي ٽو تيار ڪرڻ جي مذمت ڪندي چيو آھي تہ ملڪ اڳ ۾ ئي سياسي ۽ معاشي بحران جو شڪار آھي. حڪومت جون پاليسيون ملڪ کي وڌيڪ بحرانن ۾ وجھي رھيون آھن. انڊس رور سسٽم تي ڪو بہ نئون ڪئنال يا ڊيم قبول نه ڪيو ويندو. پاڻي تي ڌاڙي جي مزاحمت ڪنداسين. اياز لطيف پليجي چيو تہ سنڌو درياھ تي ڌاڙا ھڻي پاڻي چوري ڪيو وڃي ٿو. سنڌ کي پنھنجي حصي جو پاڻي نٿو ڏنو وڃي. ڪوٽڙي کان ھيٺ واري پئي اڏامي. پاڻي نہ ملڻ ڪري سنڌ جون لکين ايڪڙ آباد زمينون بنجر ۽ ڀڙڀانگ ٿي ويون آھن. آبادگارن جو معاشي قتل ڪيو پيو وڃي. اياز لطيف پليجي چيو تہ جيڪي فصل ٿين ٿا انھن جا اگھ ڪيرايا وڃن ٿا، نقلي ٻج، نقلي زرعي دوائون ۽ نقلي ٻج جي ڪري آبادگارن جو وڏو نقصان ٿي رھيو آھي. سنڌ حڪومت يا وفاقي حڪومت وٽ سنڌ جي زرعي معيشت جي بحالي لاءِ ڪو بہ منصوبو ناھي. حڪومت جون پاليسيون سنڌ جي لاء زراعت دشمن آھن. زرعي بدحالي جي ڪري سنڌ ۾ وڏي پئماني تي غربت، بدحالي ۽ بيروزگاري ۾ اضافو ٿيو آھي. اياز لطيف پليجي چيو تہ جيڪڏھن نوان ڊيم ۽ تڪراري نوان ڪئنال ٺهيا تہ سنڌ بنجر ۽ بک بنجي ويندي. نوان ڊيم ۽ نوان ڪئنال سنڌ لاءِ موت جا منصوبا آھن. جنھنڪري ڪنھن بہ ريت ڊيم ۽ ڪئنال منصوبا ٺھڻ نہ ڏينداسين