عمرڪوٽ ۽ ٿرپارڪر جي عوام پيئڻ جي پاڻي لاءِ پريشان آهي: نيلم ڪماري

ايم اين اي نيلم ڪماري بجيٽ اجلاس دوران ٿر ۾ پاڻي جي کوٽ، فصلن جي تباهي، گهٽ عمر نياڻين جي مسئلن بابت آواز اٿاريو

عمرڪوٽ (رپورٽ:ڪانجي مل رکيسر) قومي اسيمبلي جي بجيٽ اجلاس 2026 ۾ پاڪستان مسلم ليگ (ن) جي اقليتي ميمبر قومي اسيمبلي نيلم ڪماري عمرڪوٽ ۽ ٿرپارڪر جي عوام کي درپيش بنيادي مسئلن تي آواز بلند ڪندي حڪومت جو ڌيان ريگستاني علائقن جي اهم مسئلن ڏانهن ڇڪايو، هن خطاب ڪندي چيو ته عمرڪوٽ ۽ ٿرپارڪر جا عوام پيئڻ جي صاف پاڻي لاءِ سخت مشڪلاتن کي منهن ڏئي رهيا آهن، جڏهن ته پاڻي جي شديد کوٽ سبب زرعي زمينون متاثر ٿي رهيون آهن ۽ آبادگارن جا فصل تباهي جو شڪار ٿي رهيا آهن، هن مطالبو ڪيو ته پاڻي جي مسئلي جي مستقل حل لاءِ خاص منصوبا شروع ڪيا وڃن ۽ بجيٽ ۾ مناسب فنڊ رکيا وڃن، نيلم ڪماري چيو ته ريگستاني علائقن ۾ بنيادي سهولتن جي فراهمي، زراعت جي تحفظ ۽ عوامي مسئلن جي خاتمي لاءِ عملي قدم کڻڻ انتهائي ضروري آهن، هن گهٽ عمر نياڻين جي اغوا جهڙن حساس معاملن تي به ڳڻتي جو اظهار ڪندي چيو ته اهڙن واقعن جي روڪٿام لاءِ اثرائتا قدم کنيا وڃن، جڏهن ته متاثر خاندانن کي فوري انصاف جي فراهمي يقيني بڻائي وڃي، قومي اسيمبلي جي ميمبر اقليتي نوجوانن جي مسئلن جو ذڪر ڪندي چيو ته تعليم ۽ روزگار جا موقعا وڌائڻ جي ضرورت آهي، هن مطالبو ڪيو ته هندو نوجوانن سميت اقليتي شاگردن ۽ شاگردياڻين لاءِ اسڪالرشپ ۾ اضافو ڪيو وڃي، جيئن هو بهتر تعليم حاصل ڪري اڳتي وڌي سگهن، هن عمرڪوٽ ۽ ٿرپارڪر ۾ تعليم، صحت، پاڻي ۽ ترقياتي منصوبن لاءِ بجيٽ ۾ خاص ڌيان ڏيڻ جو مطالبو ڪندي چيو ته پٺتي پيل علائقن جي ترقي کانسواءِ ملڪ جي ترقي جو خواب مڪمل نٿو ٿي سگهي.