ايڊيشنل ڊپٽي ڪمشنر عمران الحق جي صدارت هيٺ ڊسٽرڪٽ هيومن رائٽس ڪميٽي جو اجلاس

ٺٽو(ڊ ر) ڊپٽي ڪمشنر ٺٽو سرمد علي ڀاڳت جي هدايت تي ايڊيشنل ڊپٽي ڪمشنر عمران الحق جي صدارت هيٺ ڊسٽرڪٽ هيومن رائٽس ڪميٽي جو ماهوار اجلاس درٻار هال مڪلي ۾ منعقد ٿيو، جنهن ۾ ايڊيشنل ڊائريڪٽر سوشل ويلفيئر خدابخش ڀراني، ڪميٽي جي ميمبرن سينيئر ايڊووڪيٽ سيد اعجاز حسين شاهه، وقارالنساءَ، عبدالجبار بلوچ، الطاف حسين تينو سميت ٻين لاڳاپيل آفيسرن ۽ ميمبرن شرڪت ڪئي۔ اجلاس ۾ انساني حقن سان لاڳاپيل مختلف ڪيسن تي تفصيلي غور ويچار ڪيو ويو ، خاص طور ٻارن سان زيادتي جي واقعن، هيومن رائٽس ڪيسن ۾ پوليس طرفان ايف آءِ آر جي بروقت داخل ڪرڻ ۾ دير، مليل نامعلوم لاشن جي شفاف جاچ ۽ ٻين اهم معاملن تي بحث ڪيو ويو۔ ان موقعي تي ايڊيشنل ڊپٽي ڪمشنر عمران الحق چيو ته انساني حقن جو تحفظ رياست جي اولين ذميواري آهي، ان سلسلي ۾ ڪنهن به قسم جي غفلت برداشت نه ڪئي ويندي۔ هن لاڳاپيل ادارن کي هدايت ڪئي ته عوام ۾ شعور ۽ آگاهي پيدا ڪرڻ لاءِ جيلن، ٿاڻن ۽ اسڪولن جا باقاعده دورا ڪيا وڃن ۽ انساني حقن بابت آگاهي پروگرامن کي وڌيڪ مؤثر بڻايو وڃي۔ هن وڌيڪ هدايت جاري ڪئي ته ايندڙ اجلاس ۾ سمورا لاڳاپيل کاتا پنهنجي ڪارڪردگي ۽ اڳڀرائي بابت تفصيلي رپورٽ پيش ڪن، جيئن مسئلن جي حل لاءِ مؤثر حڪمت عملي جوڙي سگهجي۔