گجو ويجهو پاڻي ڀرڻ ويندڙ عورت روڊ حادثي ۾ فوت، قومي شاهراهه تي 4 ڪلاڪ ڌرڻو

ٺٽو( محمد شفيق ڀٽي)گجو ڀرسان ڳوٺ علي محمد ڪاتيار جي رهواسڻ سڪينه زال گلشير ڪاتيار پيئڻ جي پاڻي لاءِ ڪي ڊي واهه ڏانهن ويندي قومي شاهراهه پار ڪرڻ دوران تيز رفتار اي سي ڪوچ جي ٽڪر ۾ سخت زخمي ٿي پئي. کيس ڳڻتي جوڳي حالت ۾ ڪراچي منتقل ڪيو ويو، جتي هوءَ زخمن جا سور نه سهندي فوت ٿي وئي. تفصيل موجب ڳوٺ جي واٽر سپلاءِ اسڪيم ڊگهي عرصي کان بند هجڻ سبب عورتون روزانو قومي شاهراهه پار ڪري ڪي ڊي واهه تان پاڻي ڀرڻ وڃن ٿيون. مقامي رهواسين موجب پيئڻ جي پاڻي جي شديد کوٽ سبب عورتون ۽ ٻار روزانو جان جوکي ۾ وجهي شاهراهه پار ڪرڻ تي مجبور آهن، جنهن ڪري هن هنڌ اڳ به ڪيترائي حادثا پيش اچي چڪا آهن. حادثي کانپوءِ مشتعل ڳوٺاڻن اي سي ڪوچ جا شيشا ٽوڙي ڇڏيا ۽ ڊرائيور تي به سخت تشدد ڪيو، جنهن سبب هو مرڻينگ ٿي پيو. گجو پوليس بروقت ڪارروائي ڪندي ڊرائيور کي مشتعل ماڻهن کان بچائي چوڪي تي منتقل ڪيو، جتان سندس حالت ڳڻتي جوڳي هجڻ سبب اسپتال روانو ڪيو ويو، جڏهن ته ڪوچ جي ڪلينر کي پڻ پوليس تحويل ۾ وٺي ڇڏيو. ذريعن موجب، واقعي دوران ڪجهه شرپسند ماڻهن موقعي مان ناجائز فائدو وٺندي ڪوچ ۾ پيل مسافرن جي سامان کي چوري ڪرڻ جي ڪوشش ڪئي. واقعي خلاف مشتعل ڳوٺاڻن ڪراچي–ٺٽو قومي شاهراهه تي ڌرڻو هڻي ٻنهي طرفن کان ٽريفڪ معطل ڪري ڇڏي، جنهن سبب سوين گاڏيون ڦاسي ويون ۽ ٻنهي پاسن ڊگهيون قطارون لڳي ويون. احتجاج لڳ ڀڳ چار ڪلاڪن تائين جاري رهيو. مظاهرين جو چوڻ هو ته ڳوٺ جي واٽر سپلاءِ بند هجڻ سبب عورتون ۽ ٻار روزانو قومي شاهراهه پار ڪري پاڻي ڀرڻ تي مجبور آهن، جڏهن ته ساڳئي مجبوري سبب ڪيترائي قيمتي جاني نقصان اڳ به ٿي چڪا آهن. هنن مطالبو ڪيو ته واٽر سپلاءِ اسڪيم فوري طور بحال ڪئي وڃي ته جيئن مستقبل ۾ اهڙن المناڪ حادثن کان بچي سگهجي. احتجاج ختم ڪرائڻ لاءِ اسسٽنٽ ڪمشنر ميرپور ساڪرو نبي بخش سولنگي واقعي واري هنڌ پهچي ڳوٺاڻن سان ڳالهيون ڪيون ۽ پبلڪ هيلٿ ٺٽو جي انجنيئر نقاش پليجو کي پڻ موقعي تي گهرايو، جنهن ڳوٺ جي پاڻي واري مسئلي کي جلد حل ڪرائڻ جي خاطري ڪرائي. تنهن هوندي به ڳوٺاڻن شروعاتي طور شاهراهه کولڻ کان انڪار ڪري ڇڏيو. بعد ۾ سماجي اڳواڻ سرور شاهه ڀاڏائي ۽ درگاهه شيخ حاجي ترابي جي گادي نشين غلام حسين نانا شيخ ڳوٺاڻن سان ڳالهيون ڪيون ۽ صوبائي وزير رياض شاهه شيرازي سان ٽيليفون تي رابطو ڪيو، جنهن واٽر سپلاءِ جو مسئلو جلد حل ڪرائڻ جي خاطري ڪرائي. ان کانپوءِ ڳوٺاڻن ڌرڻو ختم ڪري قومي شاهراهه ٽريفڪ لاءِ کولي ڇڏي. مقامي رهواسين جو چوڻ آهي ته افسوس جي ڳالهه اها آهي ته ڳوٺ کان ٿوري ئي مفاصلي تي پاڻي ڪراچي منتقل ڪيو پيو وڃي، پر گجو ڀرسان ڪيترائي ڳوٺ اڄ به پيئڻ جي صاف پاڻي کان محروم آهن، جنهن ڪري عورتون روزانو مصروف قومي شاهراهه پار ڪري پاڻي ڀرڻ تي مجبور آهن. هنن حڪومت کان مطالبو ڪيو ته متاثر ڳوٺن جي واٽر سپلاءِ فوري بحال ڪري انساني جانين جي وڌيڪ نقصان کي روڪيو وڃي ۽ ذميوار ادارا مستقل بنيادن تي اهڙا قدم کڻن، جيئن مستقبل ۾ ڪنهن به بيگناهه کي پاڻي جي هڪ گهڙي لاءِ پنهنجي جان نه وڃائڻي پوي.