ٺٽي ۾ سولنگي برادري پاران ڳوٺ عارب سولنگي جو دورو

اڳوڻي جج ۽ سينيئر قانوندان ذوالفقار سولنگي ڳوٺاڻن جو مفت ڪيس وڙهڻ جو اعلان

ٺٽو(ڊر) روينيو عملدارن پاران پوليس جي مبينا ملي ڀڳت سان ٺٽي لڳ پوليس گردي جو شڪار بڻيل ڳوٺ عارب سولنگي کي ڊاهي پٽ ڪرڻ واري معاملي تي سولنگي برادري جي معزز، اڳوڻي جج ۽ سينيئر قانوندان ذوالفقار سولنگي ڳوٺ عارب سولنگي پهچي متاثر ڳوٺاڻن ۽ مقامي اڳواڻن سان همدردي جو اظهار ڪندي سندن قانوني مدد لاءِ مفت ڪيس وڙهڻ جو اعلان ڪندي ذوالفقار سولنگي چيو ته انتظاميا هٿ وٺي پوليس جي مبينا ملي ڀڳت سان مسڪين ڳوٺاڻن سان ظلم ڪيو آهي، جنهن کي ڪنهن به صورت ۾ برداشت نه ڪيو ويندو. هن چيو ته ذميوارن خلاف قانوني جدوجهد ڪري کين ڪيفرِ ڪردار تائين پهچائڻ لاءِ هر ممڪن قانوني قدم کنيا ويندا. ان موقعي تي سينيئر صحافي ۽ ڳوٺ عارب سولنگي جي رهواسي حاجن سولنگي، سولنگي برادري جي معزز محمد حسن سولنگي ۽ ٻين ڳوٺاڻن اڳوڻي جج ذوالفقار سولنگي کي ڳوٺ ۾ ٿيل مبينا پوليس گردي، گهر ڊاهڻ ۽ متاثر خاندانن کي پيش آيل صورتحال بابت آگاهي ڏيئي سندن مدد ۽ همدردي تي شڪريو ادا ڪيو. اڳوڻي جج ۽ سينيئر قانوندان ذوالفقار سولنگي سان گڏ سولنگي برادري جا معزز عبداللطيف سولنگي، محمد پيريل سولنگي، خليل الله سولنگي، سلطان احمد سولنگي، زڪاءَ الله سولنگي ۽ ٻيا پڻ گڏ هئا.