حيدرآباد ۾ سنڌياڻي تحريڪ جو وفد مقتول نصر الله خاصخيلي جي گهر پهتو

41 views | 27th Jul 2023 • سنڌي خبرون

سنڌياڻي تحريڪ ۽ قومي عوامي تحريڪ قاتلن جي گرفتاري ۽ انصاف ڏيارڻ ۾ مقتول جي وارثن سان گڏ آھي: زينت سمون

حيدرآباد(بيورو) حيدرآباد ۾ سنڌياڻي تحريڪ جي مرڪزي صدر زينت سمون، نصرت خاصخيلي ھميرا اختر جي اڳواڻي ۾ وفد ڀٽائي ننگر ٿاڻي جي حد ۾ 2 مھينا اڳ گوليون ھڻي قتل ڪيل لوڪل گورنمينٽ جي ملازم نصرالله خاصخيلي جي تڏي تي ڳوٺ ڪرن خان شورو پھچي بيواھ ۽ سندس نياڻين سان تعزيت ڪئي ۽ کين اياز لطيف پليجي پاران انصاف ڏيارڻ لاءِ سھڪار جي خاطري ڪرائي. ان موقعي تي مقتول جي بيواھ چيو تہ منھنجي مڙس کي بيگناھ گوليون ھڻي شھيد ڪيو ويو. پوليس اسان ان انصاف نٿي ڪري. ان موقعي تي سنڌياڻي تحريڪ جي صدر زينت سمون چيو تہ قومي عوامي تحريڪ ۽ سنڌياڻي تحريڪ نوجوان نصرالله خاصخيلي جي قتل جي مذمت ڪري ٿي. اسين آئي جي سنڌ کان مطالبو ڪريون ٿا تہ نصرالله خاصخيلي جا قاتل فوري طور گرفتار ڪيا وڃن. زينت سمون چيو تہ سنڌياڻي تحريڪ ۽ قومي عوامي تحريڪ قاتلن جي گرفتاري ۽ انصاف ڏيارڻ ۾ مقتول جي وارثن سان گڏ آھي. جيڪڏھن جلد قاتل گرفتار نه ڪيا ويا تہ وارثن سان گڏجي احتجاجي لائحه عمل جوڙيو ويندو.