ٺٽي ۾ مغوين جي بازيابي لاءِ، ڪنڌڪوٽ ڌرڻي تي پوليس چڙھائي خلاف احتجاجي ريلي

100 views | 08th Sep 2023 • سنڌي خبرون

قومي عوامي عوامي مرڪز جي سڏ تي شبير ڀٽي، ممتاز شيخ ۽ ٻين جي اڳواڻي ۾ احتجاجي ريلي ڪڍي وئي

ٺٽو( شفيق ڀٽي) ڪنڌڪوٽ ۾ ڌاڙيلن ھٿان اغوا ٿيل مغوين جي بازيابي تي ٿيندڙ پوليس ڪاروائي ۽ مظاھرين تي تشدد ڪري زخمي ڪرڻ واري عمل توڙي معصوم پريا ڪماري سميت ٻيا مغوي بازياب نہ ٿيڻ خلاف قومي عوامي عوامي مرڪز جي سڏ تي ٺٽي ۾ قومي عوامي عوامي تحريڪ جي ضلعي صدر شبير ڀٽي، جنرل سيڪريٽري ممتاز شيخ، صاحب ڏنو سمون، سماجي اڳواڻن جمشيد قريشي، گلاب رند ۽ ٻين جي اڳواڻي ۾ ايڌي سينٽر ٺٽو کان ريلي ڪڍي وئي، ريلي قومي شاھراھ جو گشت ڪندي پريس ڪلب ٺٽي اڳيان پھتي، جتي احتجاجي مظاھرو ڪري ڌرڻو ھنيو ويو، احتجاج ۾ شامل ڪارڪن سنڌ ۾ سرداري نظام ۽ اغوا انڊسٽري خلاف زوردار نعريبازي ڪري رھيا ھئا. ان موقعي تي اڳواڻن خطاب ڪندي چيو تہ ھڪ سازش تحت سنڌ ۾ ڌاڙيل ڪلچر کي ھٿي ڏني پئي وڃي، سڄي سنڌ ۾ بربريت پيدا ڪئي وئي آھي، ھاڻي تہ معصوم ٻار ۽ عورتون بہ محفوظ ناھن. ھنن چيو تہ معصوم پريا ڪماري گذريل 2 سالن کان ڌاڙيلن جي چنبي ۾ آھي ۽ ان سميت 25 کان مٿي ماڻھو ڌاڙيلن وٽ مغوي بڻيل آھن، جن ۾ عورتون بہ شامل آھن پر پوليس انھن جي بازيابي لاءِ ڪوششون ڪرڻ بدران مغوين جي آزادي لاءِ احتجاج ڪندڙن تي ڪڙڪي پئي، مظاھرين تي سخت تشدد ڪيو ويو جنھن جي سخت لفظن ۾ مذمت ڪريون ٿا. ھنن مطالبو ڪيو تہ معصوم پريا ڪماري سميت سمورا مغوي بازياب ڪرايا وڃن ۽ ڪنڌڪوٽ ڌرڻي تي حملو ڪندڙ پوليس اھلڪارن خلاف ڪاروايون ڪيون وڃن.