ڪراچي جي ناري پيار پرڻو ڪري ڇڏيو، تحفظ جي گھر

شادي بعد مائٽ جاني دشمن بڻجي ويا آهن، تحفظ ڏنو وڃي:مصباح

ڪراچي (رپورٽر) ڪراچي ۾ نوجوان سان پسند جي شادي ڪندڙ ناري حڪومت کان تحفظ جو مطالبو ڪري ڇڏيو، ڪراچي جي اختر ڪالوني واسڻ ناري مصباح پنهنجي مڙس عبدالرحيم جوڻو سان گڏ ميڊيا جي نمائندن کي نڪاح نامو ۽ ٻيا ڪاغذ ڏيکاريندي چيو ته هن 15 ڏينهن اڳ نواجون عبدالرحيم جوڻو سان جڙانواله جي عدالت ۾ مرضي جي شادي ڪئي آهي، جنهن کانپوءِ سندس مامو خرم، نانو اسلم ۽ ماسڙ مختيار احمد جاني دشمن بڻجي ويا آهن، جيڪي سندس مڙس عبدالرحيم مٿان ڪوڙا ڪيس داخل ڪرائي مختلف طريقن سان نقصان پهچائڻ جو ڌمڪيون ڏئي رهيا آهن، مصباح ٻڌايو ته منهنجو والد فوت ٿي چڪو آهي، مامو ۽ نانو هڪ پيرسن سان زبردستي شادي ڪرائڻ چاهين پيا پر مان موقعو ڏسي گهران نڪتيس ۽ عبدالرحيم سان پسند جي شادي ڪئي آهي، مون کي نه ڪنهن ورغلايو آهي نه وري ڪا زبردستي ڪئي وئي آهي، هن چيو ته منهنجو نانو ۽ مامو منهنجي مڙس ۽ ان جي مائٽن مٿان ڪوڙا ڪيس داخل ڪرائي رهيا آهن، جنهن سبب اسان هر وقت خوف ۾ آهيون ۽ لڪڻ تي مجبور آهيون، هن اعليٰ اختيارين کي اپيل ڪئي ته مون کي ۽ مڙس کي تحفظ فراهم ڪيو وڃي، اسان جو ڪوبه نقصان پهتو ته ان جا ذميوار منهنجو نانو اسلم، مامو خرم ۽ ماسڙ مختيار احمد هوندا.