صحت – الله پاڪ جي عظيم نعمت

ليکڪ: سيده سونيا منور

دنيا جو صحت جو ڏينهن هر سال 7 اپريل تي ملهايو ويندو آهي ته جيئن دنيا ۾ صحت بابت شعور اجاگر ڪري سگهجي. هي ڏينهن عالمي صحت اداري (WHO) جي قيام جي ياد ۾ ملهايو ويندو آهي. ان جو مقصد ماڻهن کي صحتمند طرز زندگي اختيار ڪرڻ جي همت افزائي ڪرڻ ۽ بيمارين کان بچاءَ جي اهم قدمن جي اهميت کي اجاگر ڪرڻ آهي. ورلڊ هيلٿ ڊي جي موقعي تي مختلف ملڪن ۾ شعور وڌائڻ لاءِ واک، ميڊيڪل ڪئمپس، سيمينار ۽ اسڪولن ۾ پروگرام منعقد ڪيا ويندا آهن ته جيئن صحت بابت تعليم عام ٿي سگهي. اهو اسان سڀني جي ذميواري آهي ته اسان صحتمند عادتن کي پنهنجون، جيئن صاف پاڻي پيئڻ، متوازن خوراڪ کائڻ، ورزش ڪرڻ، ۽ ٻين کي به صحت جي اهميت بابت ٻڌائڻ، ته جيئن هڪ بهتر ۽ صحتمند سماج جوڙجي سگهي. صحت الله پاڪ جي هڪ عظيم نعمت آهي. جيڪڏهن انسان صحتمند هجي ته هو زندگي جي هر شعبي ۾ ڀرپور طريقي سان حصو وٺي سگهي ٿو. صحتمند جسم ئي صحتمند ذهن کي جنم ڏئي ٿو. ان اهميت کي اجاگر ڪرڻ لاءِ هر سال 7 اپريل تي صحت جو عالمي ڏينهن ملهايو ويندو آهي. هن ڏينهن جو مقصد عام ماڻهن ۾ صحت بابت شعور پيدا ڪرڻ ۽ بيمارين کان بچاءَ جا طريقا سمجهائڻ آهي. هن ڏينهن جي شروعات عالمي صحت اداري (WHO) ڪئي هئي. هر سال هن ڏينهن لاءِ هڪ مخصوص موضوع چونڊيو ويندو آهي، جنهن تحت مختلف تقاريب، سيمينار، واک ۽ ڪئمپس منعقد ڪيا ويندا آهن. اسان جي روزمره زندگيءَ ۾ ڪيتريون عادتون اهڙيون هونديون آهن جيڪي اسان جي صحت تي منفي اثر وجهن ٿيون، جيئن غير متوازن خوراڪ، جسماني سرگرمين جي کوٽ، تمباڪو نوشي، ۽ ننڊ جي کوٽ. صحتمند رهڻ لاءِ متوازن خوراڪ، روزاني ورزش، صاف ماحول ۽ مثبت سوچ تمام ضروري آهن. هي ڏينهن اسان کي انهن ڳالهين جي ياد ڏياري ٿو. شهري علائقن ۾ صحت جون سهولتون نسبتاً بهتر هونديون آهن، جتي سرڪاري ۽ نجي اسپتالون، ڪلينڪون، ليبارٽريون ۽ ماهر ڊاڪٽرن جي دستيابي وڌيڪ هوندي آهي. شهري علائقن ۾ ايمبولينس سروس، ويڪسين، جديد اوزار، ۽ ايمرجنسي خدمتون به آساني سان موجود هونديون آهن. تعليم يافته عملي ۽ صحت بابت شعور به شهري علائقن ۾ وڌيڪ ڏٺو ويندو آهي. ان جي ابتڙ، ڳوٺاڻن علائقن ۾ صحت جون سهولتون اڪثر اڻپوريون هونديون آهن. اتي بنيادي صحت مرڪز (BHU) يا ڳوٺاڻا صحت مرڪز ته موجود هوندا آهن، پر اڪثر اوقات ڊاڪٽرن جي کوٽ، دوائن جي اڻاٺ، ۽ جديد طبي اوزارن جي غير موجودگي جا مسئلا هوندا آهن. ڪيترن ئي ڳوٺاڻن علائقن ۾ صحت جون سهولتون حاصل ڪرڻ ڏکيو هوندو آهي، ۽ ماڻهن کي شهرن ڏانهن سفر ڪرڻو پوندو آهي. صحت جو عالمي ڏينهن اسان کي اهو پيغام ڏئي ٿو ته صحت جي حفاظت هر فرد جي ذميواري آهي. حڪومتن، ادارن، ڊاڪٽرن ۽ عام ماڻهن کي گڏجي صحتمند سماج ٺاهڻ لاءِ ڪم ڪرڻ گهرجي. اسان کي پنهنجي ۽ پنهنجي آس پاس وارن ماڻهن جي صحت جو خيال رکڻ گهرجي ته جيئن هڪ بهتر، خوشحال ۽ ترقي يافته سماج جوڙجي. حڪومت کي گهرجي ته اها صحت واري شعبي لاءِ مناسب بجيٽ مختص ڪري، ته جيئن اسپتالن، ڪلينڪن ۽ ڳوٺاڻن صحت مرڪزن جي بهتري ممڪن ٿي سگهي. هر شهري کي بنيادي صحت جون سهولتون، جيئن صاف پاڻي، مناسب خوراڪ، ويڪسين، ۽ ابتدائي طبي امداد ڏيڻ حڪومت جي اولين ذميواري آهي. ڳوٺاڻن علائقن ۾ صحت جي سهولتن جي کوٽ کي ختم ڪرڻ لاءِ، حڪومت کي اتي ماهر ڊاڪٽرن جي مقرري، دوائن جي فراهمي، موبائل اسپتالن ۽ صحت بابت شعور پيدا ڪرڻ واري مهم هلائڻ گهرجي. حڪومت کي گهرجي ته سرڪاري اسپتالن مان ڪرپشن، لاپرواهي، ۽ خراب انتظام ختم ڪري، ڊاڪٽرن جي تربيت بهتر بڻائي، ۽ صحت واري شعبي ۾ جديد ٽيڪنالاجي متعارف ڪرائي. صحت بابت شعور وڌائڻ لاءِ، حڪومت کي ميڊيا، اسڪولن، ۽ سوشل ميڊيا پليٽفارمز ذريعي مهمون هلائڻ گهرجن ته جيئن ماڻهو بيمارين کان بچاءَ جا طريقا اختيار ڪن ۽ صحتمند طرز زندگي گذارين.