عمرڪوٽ ۾ ڪچي شراب، فحاشي جي اڏن ۽ وڌندڙ بدامني خلاف مختلف برادرين جو احتجاج

عمرڪوٽ (رپورٽ:ڪانجي مل رکيسر) عمرڪوٽ شهر ۽ ڀرپاسي جي علائقن ۾ وڌندڙ بدامني، ڪچي شراب جي واپار، ۽ فحاشي جي اڏن خلاف ڪولهي، ٻٻر، ڀيل، ۽ مالهي برادرين سان تعلق رکندڙ ماڻهن پاران سخت احتجاجي مظاهرو ڪيو ويو، احتجاج ڪندڙن هٿن ۾ بينر ۽ پلي ڪارڊ کڻي پوليس ۽ انتظاميا خلاف نعريبازي ڪئي، احتجاج جي اڳواڻي ڊاڪٽر جمال ڀيل، روپچند ڀيل، لکمير اوڏ، پانچارام ڪولهي، ڏيرام نائي، عنايت علي ٻٻر، ۽ ليکراج مالهي سميت ٻين سماجي اڳواڻن ڪئي، هنن ميڊيا سان ڳالهائيندي چيو ته عمرڪوٽ ويجهو منو مالهي، خاص طور جوگي پاڙي ۾، ڪچي شراب جون بٺيون ۽ فحاشي جا اڏا بي ڌڙڪ هلي رهيا آهن، جن سبب علائقي ۾ بدامني وڌي وئي آهي، اسان پنهنجي گهرن کان ٻاهر نڪري به نٿا سگهون، ڏوهاري ماڻهن جنجال مچائي ڇڏيو آهي، احتجاج ڪندڙن الزام لڳايو ته پوليس کي ڪيترائي ڀيرا شڪايتون ڏيڻ باوجود ڪا ڪارروائي نه ٿي آهي، بلڪه پوليس الٽو متاثر ماڻهن کي تنگ ڪري رهي آهي، هنن سنڌ اسيمبلي جي ميمبر سيد امير شاهه ۽ ايس پي عمرڪوٽ عزيز احمد ميمڻ کان مطالبو ڪيو ته فوري طور صورتحال جو نوٽيس وٺي، منو مالهي جي جوگي پاڙي سميت ٻين علائقن مان ڪچي شراب جي بٺين ۽ فحاشي جي اڏن خلاف قانوني ڪارروائي ڪئي وڃي ۽ مقامي ماڻهن کي تحفظ فراهم ڪيو وڃي.