قومي عوامي تحريڪ جي مرڪزي سڏ تي مختلف شهرن ۾ ريليون ۽ مظاهرا جاري

ٺٽو، ملير، حيدرآباد، ٻهارا، ٿرپارڪر، ڪنڌڪوٽ، ڳڙهي خيرو ۽ ٻين شهرن ۾ ريليون ڪڍيون ويون

حيدرآباد(بيورو)سنڌ ۾ پاڻي جي کوٽ ،ذوالفقار آباد، سنڌو درياھ تي ڌاڙي، 28ھين ترميم، ڪرپشن، سنڌ ٽوڙڻ جي سازش سميت سنڌ دشمن منصوبن خلاف قومي عوامي تحريڪ جي مرڪزي سڏ تي متحد ۽ مضبوط سنڌ جي عنوان سان 10ھين ڏينھن بہ مختلف شھرن ۾ پيادل مارچ ريليون ۽ مظاھرا ڪيا ويا. ان ڏس ۾ سجاڳ ٻار تحريڪ (ڪيو اي ٽي) پاران اسٽيل موڙ کان پريس ڪلب ملير تائين سجاڳ ٻار تحريڪ جي اڳواڻن عائشا فرحان لاڙڪ، سرمد اتيرو، پرڪاش ڪمار، مڪيس ڀيل جي اڳواڻي ۾ سوين ٻارن پيادل مارچ ڪيو.قومي عوامي تحريڪ جي اڳواڻن فرحان لاڙڪ، منان شيخ، اشفاڇ چنڙ، ڪاشف خاصخيلي، فياض اتيرو، جنسار ھيسباڻي، ھريرام چوھاڻ، لال چند، جان محمد قريشي، ضمير لغاري ۽ ٻين اڳواڻن ئي ڪارڪن وڏي تعداد ۾ شرڪت ڪئي.قومي عوامي تحريڪ ضلعي ٺٽي جي صدر مرتضيٰ لاشاري، ياسر جاکرو حبيب الله پليجو، غفور سومرو ۽ ٻين جي اڳواڻي سوين ماڻهن سخت گرمي ۾ ساڪرو ڪراچي روڊ کان متحد ۽ مضبوط سنڌ پيادل مارچ ڪيو جيڪو ٻھارا شھر مين بس اسٽاپ پھتو جتي ڌرڻو هنيو. ھوڏانھن حيدرآباد جي علائقي سيري ۾ ريلي ڪڍي وئي، جنھن جي اڳواڻي قومي عوامي تحريڪ جي مرڪزي سينئر ڊپٽي جنرل سيڪريٽري الطاف خاصخيلي، نظير بليدي، نور حسن جمالي، خير جان چانڊيو، راول سيال، بابو سولنگي، طاھر گھانگھرو، ايڊووڪيٽ رئوف انصاري، ناصر ملاح ۽ ٻين ڪئي. ھوڏانھن ڪنڌڪوٽ ڊسٽرڪٽ اينڊ سيشن ڪورٽ ۾ قومي عوامي تحريڪ اڳواڻن ايڊووڪيٽ عبدالغني بجاراڻي ۽ ٻين بار جي وڪيلن ۾ ھينڊبل ورھايا ۽ اياز لطيف پليجو جو پيغام ڏنو. نصير آباد ۾ اسد سنڌي، حفيظ تونيو، انعام الله ڪانڌڙو ۽ نادر ٻرڙو شھر ۾ پيادل مارچ ڪري واپارين، دڪاندارن ۽ شھرين ۾ ھينڊ بل ورھايا. جڏھن تہ ٿرپارڪر جي ڳوٺ کاريواھ ۾ ڪارنر گڏجاڻي منعقد ڪئي وئي ، جنهن کي ضلعي ٿرپارڪر صدر وجئہ ساگر ۽ ٻين خطاب ڪيو. ھوڏانھن ڳڙھي خيرو ۾ تعلقي صدر جاويد جمالي، نورنبي بروهي، شوڪت ڀٽي، بھار خان، شعبان جمالي ٻين پاران لانگاھ پمپ کان بيگاري پل تائين پيادل مارچ ڪئي وئي. ان موقعي تي اڳواڻن خطاب ڪندي چيو تہ پيپلزپارٽي ذوالفقار آباد جي نالي ۾ نئون اسرائيل ٺاهڻ چاهي ٿي ذوالفقار آباد کي اٺ ڪروڙ سنڌي رد ڪري چڪا آهن پيپلزپارٽي اقتدار جي طاقت جي نشي ۾ ھوش وڃائي ويٺي آهي سنڌ سنڌين جو تاريخي وطن آهي سنڌ جي جاگرافيائي حدن سان ھٿ چراند بند ڪئي وڃي. اڳواڻن چيو تہ پاڻي زندگي ۽ جياپو آهي. پيپلزپارٽي ۽ سنڌ حڪومت جي نااهلي جي ڪري سنڌ ۾ پاڻي جي شديد کوٽ پيدا ٿي وئي آهي. ڪوٽڙي کان هيٺ پاڻي نہ ڇڏڻ ڪري ساحلي پٽي ۾ ڏڪار واري صورتحال پيدا ٿي وڃن ڪري ماڻهو لڏپلاڻ ڪري رھيا آھن ساحلي پٽي جا ماڻهو پيئڻ جي پاڻي لاءِ پريشان آهن ۽ مال اڃ وگهي مري رهيو آهي. ٺٽو، بدين ۽ سجاول ضلعي جي ساحلي پٽي علائقن جي لکين ايڪڙ زمين سمنڊ ڳڙڪائي ويو آهي. زير زمين پاڻي زهريلو ٿي ويو آهي، جنهنڪري ماڻهن ۾ بيماريون پکڙجي رهيون آهن.