عمرڪوٽ ۾ سنڌ زرعي يونيورسٽي سب ڪيمپس جي شاگردن جو انتظامي ناانصافين خلاف احتجاج

عمرڪوٽ (رپورٽ:ڪانجي مل رکيسر) سنڌ زرعي يونيورسٽي سب ڪيمپس عمرڪوٽ جي شاگردن پاران انتظاميه جي مسلسل ناانصافين، بنيادي سهولتن جي اڻاويلي ۽ تدريسي نظام جي تباهي خلاف عمرڪوٽ پريس ڪلب اڳيان سخت احتجاجي مظاهرو ڪيو ويو، مظاهري دوران شاگردن هٿن ۾ بينر کڻي نعريبازي ڪئي، ان موقعي تي راجا سوڻيکي، اياز مري، افضل ڪنڀر، رضا سومرو، علي اڪبر مهر، جگديش ڪمار، جئپال چوھاڻ ۽ ٻين شاگردن ميڊيا سان ڳالهائيندي چيو ته ڪيمپس ۾ پيئڻ لاءِ صاف پاڻي تائين موجود ناهي، عمارتون مڪمل طور تي زبون حالت ۾ آهن، بجلي جو نظام خراب آهي، تدريسي اسٽاف جي کوٽ سبب ٻين عملي کان پڙهائڻ جو ڪم ورتو پيو وڃي، پريڪٽيڪل ليبارٽريون غير فعال بڻيل آهن، جنهن ڪري تعليم جو معيار سخت متاثر ٿيو آهي، شاگردن وڌيڪَ چيو ته استادن ۽ ملازمن جون مهينن کان پگهارون بند آهن، جنهن سبب انهن ڪم جو بائيڪاٽ ڪيو آهي، ان جي نتيجي ۾ ڪيمپس جي ٽرانسپورٽ ۽ آفيسون مڪمل طور بند پيل آهن، جڏهن ته اسين شاگرد مهانگيون فيسون ڀري تعليم کان محروم آهيون، هنن الزام لڳايو ته پرو وائيس چانسلر پنهنجي من پسند ماڻهن ذريعي دانسته احتجاج ڪرايو ته جيئن شاگردن کي تنگ ڪيو وڃي، جڏهن ته شام جو ساڳئي اداري ۾ هلندڙ "ايڪسس پروگرام" جي شاگردن کي غير قانوني طور سموريون سهولتون فراهم ڪيون وڃن پيون، جيڪو واضع طور تي ٻيھرائپ کي ظاهر ڪري ٿو، شاگردن چيو ته ٽنڊوڄام يونيورسٽي جي هدايتن جي باوجود ڪيمپس انتظاميه وقت تي فيس چالان جاري نه ڪيا، ۽ جڏهن جاري ڪيا ويا ته تدريسي عمل اڳ ۾ ئي بند هو، آخر ۾ شاگردن هائير ايجوڪيشن ڪميشن ۽ زرعي يونيورسٽي ٽنڊوڄام جي پرو وائيس چانسلر کان مطالبو ڪيو ته شاگردن جا مسئلا فوري طور حل ڪري کين انصاف فراهم ڪيو وڃي.