ملير پوليس پاران ڀارتي ڳجهي ايجنسي ”را“ جا 4 ايجنٽ گرفتار ڪرڻ جي دعويٰ

ملير جي قائدآباد واري علائقي ۾ ڪارروائي دوران را جي ايجنٽن کي گرفتار ڪيو ويو، جن جو تعلق جاتي سان آهي: ايس ايس پي شعيب ميمڻ

ملير (رپورٽ: عبدالرشيد مورجھريو) ايس آءِ يو پوليس ملير قائدآباد ۾ خفيه اطلاع تي وڏي ڪارروائي ڪندي ڀارتي خفيه ايجنسي "را" سان لاڳاپيل چار جوابدارن کي گرفتار ڪري ورتو آهي. ايس ايس پي شعيب ميمڻ هڪ هنگامي پريس ڪانفرنس دوران ٻڌايو ته گرفتار ڪيل جوابدار ڀارتي ڪرنل رنجيت سان سڌي رابطي ۾ هئا. انهن جي قبضي مان چار دستي بم، هڪ پسٽل ۽ هڪ گاڏي هٿ آئي آهي.ايس ايس پي موجب، جوابدار ملڪ جي اهم فوجي تنصيبات جي جيوٽيگنگ ڪري دشمن ايجنسين تائين حساس معلومات پهچائيندا هئا.اهي چارئي جوابدار ضلعو سجاول، تعلقو جاتي جا رهواسي آهن ۽ پيشو طور مڇيرا آهن.جوابدارن جي موبائيل فونن مان ملير، فوجي تنصيبات، سي پيڪ پروجيڪٽس ۽ سجاول ۾ واقع حساس هنڌن جون لوڪيشنون ۽ تصويرون هٿ ڪيون ويون آهن، جڏهن ته انهن وٽان پاڪ فوج جو ٽريننگ مينول به هٿ آيو آهي.محمد خان ڀريو نالي جوابدار سال 2009 کان انهن سرگرمين ۾ شامل آهي، جيڪو 20 ڀيرا ڀارت جو دورو ڪري چڪو آهي، جڏهن ته ٻيا جوابدار به ڪيترائي ڀيرا ڀارت وڃڻ جا اعتراف ڪري چڪا آهن.ايس ايس پي شعيب ميمن وڌيڪ چيو ته سڀني جوابدارن جا ڀارتي بارڊر سيڪيورٽي فورس (BSF) جي ڪرڻل رنجيت سان رابطا هئا.گرفتار جوابدارن خلاف دهشتگردي، جاسوسي ۽ ملڪ دشمني جي دفعات تحت ڪيس داخل ڪري جاچ جاري آهي.