عمرڪوٽ: ڊپٽي ڪمشنر سان ڪائنات پبلڪ اسڪول آئيڊيل ڪيمپس جي شاگردن ۽ شاگردياڻين جي ملاقات

عمرڪوٽ (رپورٽر)ڊپٽي ڪمشنر عمرڪوٽ نويد الرحمان لاڙڪ سان ڪائنات پبلڪ اسڪول آئيڊيل ڪيمپس عمرڪوٽ جي شاگردن ۽ شاگردياڻين ملاقات ڪئي. ان موقعي تي شاگردن ضلعي انتظاميہ جي ڪارڪردگي، اسڪولن جي شاگردن جي ڪيريئر ڪائونسلنگ، امتحانن دوران نقل جي خاتمي، شاگردن جي سيڪيورٽي، خاص ڪري تعليم، صحت ۽ ميونسپل خدمتن بابت مختلف سوال ڪيا. ڊپٽي ڪمشنر عمرڪوٽ نويد الرحمان لاڙڪ شاگردن جي سوالن جا تفصيلي جواب ڏنا ۽ ضلعي سطح تي جاري مختلف ترقياتي منصوبن، تعليمي معيار جي بهتري، صحت جون سهولتون وڌائڻ ۽ صفائي سٿرائي سميت ميونسپل خدمتن ۾ سڌارن لاءِ کنيل قدمن بابت روشني وڌي. ان موقعي تي هن شاگردن جي آگاهي ۽ سماجي شعور کي ساراهيو ۽ کين مستقبل جا ذميوار شهري بڻجڻ جي تلقين ڪئي. هن وڌيڪ چيو تہ اوهان پنھنجي تعليم جاري رکو، محنت ۽ لگن سان اوهان پنهنجي منزل حاصل ڪري سگهو ٿا. ڊپٽي ڪمشنر چيو تہ اوهان بہ پنهنجي قابليت ۽ صلاحيت سان فيڊرل پبلڪ سروس ڪميشن ۽ سنڌ پبلڪ سروس ڪميشن جا امتحان پاس ڪري آفيسر بڻجي سگهو ٿا ۽ عوامي خدمت سرانجام ڏئي سگهو ٿا. ھن اها بہ خاطري ڪرائي تہ شاگردن کي مختلف اسڪالرشپس بابت آگاهي فراهم ڪئي ويندي ۽ اسڪولن ۾ مختلف راندين جا پروگرام ڪرايا ويندا، جنهن ۾ ضلعي انتظاميہ مڪمل سهڪار ڪندي. ان موقعي تي ڪائنات پبلڪ اسڪول آئيڊيل ڪيمپس عمرڪوٽ جي پرنسپال ميڊم زرفشان ارباب، اسڪول ايڊمنسٽريٽر تلسي داس مالهي، اسڪول جا استاد، شاگرد ۽ شاگردياڻيون پڻ موجود هيون.