ڪراچي جي علائقي شيرپائو واسين جو پوليس ۽ بااثر جي مبينا زيادتين خلاف احتجاج

ملير (رپورٽر) بهادرآباد ڪراچي جي علائقي شيرپائو جي رهواسين پوليس جي ظلمن ۽ بااثر ماڻهن جي غنڊا گردي خلاف عوامي پريس ڪلب ملير پهچي احتجاجي مظاهرو ڪيو ۽ سخت نعريبازي ڪئي احتجاج ڪندڙن اپيل ڪئي ته بهادرآباد پوليس جي سرپرستي هيٺ علائقي جي بدنام ڏوهاري کان اسان کي تحفظ ڏنو وڃي.احتجاج جي اڳواڻي سيد محمد يوسف شاهه، رمضان شاهه، بلال شاهه، حڪيم شاهه ۽ ٻيا ڪري رهيا هڻا سندن چوڻ هو ته اسان پوليس اهلڪارن ۽ بااثر ماڻهن عرفان نيازي، شاڪر رند، ڊيوٽي آفيسر ثاقب ۽ بيٽر ملنگي عرف عالمگير جي گٺ جوڙ خلاف پريس ڪانفرنس ڪئي هئي جنهن کان پوءِ انهن جي زيادتين ۾ واڌ ٿي وئي آهي ۽ پوليس اهلڪارن انتقامي ڪارروائين ۾ تيزي آڻي ڇڏي آهي انهن ٻڌايو ته ايس پي گلشن جي آفيس مان ملاقات لاءِ فون آيو هو جنهن بعد اسان سندس آفيس پهتاسين ته اُتي ساڳيا پوليس اهلڪار ۽ غنڊا موجود هئا، جن ملاقات ڪرائڻ بدران اسان کي ڌمڪيون ڏئي آفيس مان ٻاهر ڪڍي ڇڏيو.محمد يوسف شاهه وڌيڪ ٻڌايو ته جوابدار طرفان روزانو صبح جو هٿياربند ٿي اسان جي گهرن ٻاهران فائرنگ جو سلسلو جاري آهي جنهن سبب اسان جو گهرن کان ٻاهر نڪرڻ مشڪل ٿي ويو آهي.متاثرن آءِ جي سنڌ، ايس ايس پي ايسٽ ۽ ايس ايڇ او بهادرآباد کان مطالبو ڪيو آهي ته اسان کي تحفظ فراهم ڪيو وڃي ۽ جوابدارن خلاف قانوني ڪارروائي ڪئي وڃي.