ملير ۾ برسات انتظاميه جي پت وائکي ڪري ڇڏي, مختلف علائقن مان پاڻي نيڪال نه ٿيو

ملير (رپورٽ: عبدالرشيد مورجھريو) برسات جي وسڪاري سبب ملير جي مختلف علائقن ۾ گڏ ٿيل پاڻي جي نيڪالي جو انتظام مڪمل طور ناڪام ٿي ويو آهي جنهن سبب مختلف آبادين، مارڪيٽن ۽ رستن تي برساتي پاڻي بيٺل آهي دائود چورنگي، قائد آباد، گلشن حديد، شرافي ڳوٺ، ملير سٽي، ابراهيم حيدري، ريڙهي ڳوٺ، چشما ڳوٺ، اسٽيل ٽائون ۽ پپري سميت ڪيترن ئي علائقن جا رهواسي سخت پريشاني ۾ مبتلا ٿي ويا آهن ٻي طرف دائود چورنگي ۽ قائد آباد جهڙن واپار مرڪزن ۾ مارڪيٽن اندر پاڻي داخل ٿي ويو آھي جتي نه رڳو ڪاروبار متاثر ٿي رهيو آھي پر ٽريفڪ جي رواني به سخت متاثر ٿي آهي ڪيترن ئي علائقن ۾ شهرين جي اچ وڃ جا رستا بند پيل آهن، جڏهن ته ڪيترن ئي گهرن ۾ به برساتي پاڻي داخل ٿي ويو آهي علائقن جي رهواسين مطالبو ڪيو آهي ته فوري طور پاڻي نيڪالي واري نظام کي بهتر بڻائي برساتي پاڻي جو فوري طرح نيڪال ڪيو وڃي، جيئن روزمره جي زندگي بحال ٿي سگهي