ملير ۾ برسات جو ٻيو ڏينهن، زندگي مفلوج, سڪڻ ندي م فاٿل اٺن ڳوٺاڻن کي بچايو ويو

ملير، ميمن ڳوٺ، گڏاپ، درساڻو ڇنو، گھگھر پپري، سومار ڳوٺ، عمر ماروي ڳوٺ ۽ سعود آباد سميت ڪيترائي علائقا پاڻي هيٺ

ملير (رپورٽ: عبدالرشيد مورجھريو) ڪراچي ۾ ٻئي ڏينهن به برسات جو سلسلو جاري رهيو، جنهن سبب شهر جو نظام زندگي مفلوج ٿي ويو آهي. ملير، ميمن ڳوٺ، گڏاپ، درساڻو ڇنو، گھگھر پپري، سومار ڳوٺ، عمر ماروي ڳوٺ ۽ سعود آباد سميت ڪيترائي هيٺاهين علائقا پاڻي هيٺ اچي ويا، گهٽيون ۽ روڊ تلاءَ جو منظر پيش ڪرڻ لڳا.مسلسل برسات سبب ڪيترن علائقن ۾ بجلي جي فراهمي معطل ٿي وئي، جڏهن ته اهم شاهراهن تي ٽريفڪ جام ۽ پاڻي بيهجي وڃڻ ڪري آمد و رفت سخت متاثر ٿي. ضلعي انتظاميا رين ايمرجنسي لاڳو ڪري ريسڪيو ٽيمون متحرڪ ڪري ڇڏيون آهن، جڏهن ته شهرين کي غير ضروري سفر کان پاسو ڪرڻ جي هدايت ڪئي وئي آهي. تعليمي ادارا بند رهيا ۽ هوائي اڏن تي اڏامن جو شيڊول به متاثر ٿيو. انتظاميا جو چوڻ آهي ته برسات متاثر شهرين لاءِ هيلپ لائينون فعال ڪيون ويون آهن ۽ نيڪاسيءَ لاءِ هنگامي قدم کنيا پيا وڃن. ساڳئي وقت ملير جي علائقي درساڻو ڇنو ڀرسان سکن ندي ۾ آٺ ماڻهو ڦاسي پيا. برسات کان پوءِ ندي ۾ تيز وهڪرن ۽ طغياني سبب صورتحال سنگين ٿي وئي. اکين شاهدن موجب اطلاع ڏيڻ باوجود سرڪاري ريسڪيو ٽيم وقت تي نه پهتي، جڏهن ته مقامي ماڻهن رسين ۽ ڪاٺين جي مدد سان پنهنجي مدد پاڻ تحت متاثر ماڻهن کي محفوظ هنڌ منتقل ڪيو. ان کانسواءِ سومار ڳوٺ ۾ بادل نالي ۾ ٻه مينهون ڪري مري ويون. . عوامي حلقن انتظاميا کان مطالبو ڪيو آهي ته هنگامي حالتن ۾ فوري ريسڪيو رسپانس کي يقيني بڻايو وڃي.