ڊپٽي ڪمشنر ٺٽو منور عباس سومرو جي صدارت هيٺ اجلاس

ٺٽو(شفيق ڀٽي) ڊپٽي ڪمشنر ٺٽو منور عباس سومرو جي صدارت هيٺ انساني پيپيلوما وائرس (ايڇ پي وي) ويڪسينيشن مهم بابت ضلعي اسٽيئرنگ ڪميٽي جو اجلاس سندس آفيس ۾ منعقد ٿيو. ان موقعي تي هن انساني پيپيلوما وائرس (ايڇ پي وي) سروائيڪل ڪينسر جي روڪٿام جي مهم کي ڪامياب بڻائڻ لاءِ وڌ کان وڌ آگاهي مهم هلائڻ جي ضرورت تي زور ڏنو. اجلاس ۾ 9 کان 14 سالن جي ڇوڪرين کي سروائيڪل ڪينسر کان بچاءُ لاءِ ويڪسينيشن جي حڪمت عملي تي بحث ڪيو ويو، جڏهن ته مهم جو دائرو ضلعي جي سمورن صحت مرڪزن سميت سرڪاري ۽ خانگي اسڪولن ۽ مدرسن تائين وڌائڻ جو فيصلو ڪيو ويو. ان موقعي تي ڊپٽي ڪمشنر اسٽيئرنگ ڪميٽي جي سمورن ميمبرن کي هدايت ڪئي ته اهي ويڪسينيشن مهم جي ڪاميابي کي يقيني بڻائڻ ۾ پنهنجو فعال ڪردار ادا ڪن. اجلاس ۾ ضلعي صحت آفيسر ڊاڪٽر صفدر علي شاهه، ضلعي فوڪل پرسن (ايڇ پي وي) ڊاڪٽر بخت حسين شاهه کان علاوہ صحت، پي پي ايڇ آءِ، سوشل ويلفيئر، اوقاف، اطلاعات، تعليم، پوليس، سرسو، خانگي اسڪولن ۽ مذهبي اڳواڻن شرڪت ڪئي ۽ مهم کي ڪامياب بڻائڻ ۾ پنهنجي ڀرپور تعاون جو يقين پڻ ڏياريو. اجلاس کي بريفنگ ڏيندي فوڪل پرسن (ايڇ پي وي) ٻڌايو ته 15 سيپٽمبر کان 27 سيپٽمبر 2025 تائين جاري رهندڙ ويڪسينيشن مهم جو مقصد ٺٽي ضلعي ۾ 81 ھزار کان وڌيڪ ڇوڪرين کي انساني پيپيلوما وائرس (ايڇ پي وي) سروائيڪل ڪينسر کان بچاءُ جا ٽُڪا لڳائڻ جو ھدف مقرر ڪيو ويو آھي. هن چيو ته سروائيڪل ڪينسر دنيا جي عورتن ۾ چوٿون سڀ کان عام ڪينسر آهي ۽ ايڇ پي وي ويڪسين هن بيماري کي روڪڻ ۾ اثرائتو ثابت ٿي آهي.