16سيپٽمبر ڊاڪٽر شاهنواز ڪنڀر جي ياد ۾ ملهايو وڃي: ورلڊ سنڌي ڪانگريس

مذهبي انتھاپسندي ۽ عسڪريت پسندي خلاف سنڌ جي اڻٿڪ جدوجھد کي نمايان ڪيو وڃي

نوشھروفيروز( ڊ ر)ورلڊ سنڌي ڪانگريس (WSC) سنڌ جي دانشورن، سياسي تنظيمن، سول سوسائٽي، ماهرن ۽ ساڃاه وندن کي سڏ ڏئي ٿي ته 16 سيپٽمبر تي ڊاڪٽر شاهنواز ڪنڀر جي ياد ۾ گڏجاڻيون ۽ پروگرامن جو اهتمام ڪن. 16 سيپٽمبر اهو ڏينھن آهي جيڪو ڊاڪٽر شاهنواز ڪنڀر جي قرباني کي ياد ڏياري ٿو. اها قرباني سنڌ جي سيڪيولر فڪر، انسان دوستي ۽ جبر خلاف مزاحمت جي علامت آهي. هي ڏينھن سنڌ جي سچائي ۽ اميدن واري فڪر کي زنده رکي ٿو. اسان اپيل ڪريون ٿا ته ثقافتي فورمن، شھري گڏجاڻين، سياسي گڏجاڻين ۽ علمي ادارن ۾ هن ڏينھن کي ملھائي شھيد شاھنواز جي فڪر ۽ ورثي کي ايندڙ نسل تائين پھچايو وڃي، ۽ مذهبي انتھاپسندي ۽ عسڪريت پسندي خلاف سنڌ جي اڻٿڪ جدوجھد کي نمايان ڪيو وڃي. ڊاڪٽر شاهنواز ڪنڀر جي ياد ۾ آن لائين سيمينار 16 سيپٽمبر تي پڻ منعقد ڪيو ويندو، جتي سندس فڪر ۽ خدمتن تي روشني وڌي ويندي. ڊاڪٽر لکو لوهاڻو، چيئرمين، فرحان ڪاغذي، سيڪريٽري جنرل، ورلڊ سنڌي ڪانگريس، صغير شيخ ۽ ٻين جو چوڻ ھو تہ ڊاڪٽر شاهنواز ڪنڀر کي خراج عقيدت لاء کيس سيڪيولر سنڌ جو روشن ستارو قرار ڏنو ويو آهي.