ڪراچي سنڌ جي دل آهي. سنڌ کي ورھائڻ جي ڳالھ پاڪسٿان کي ٽوڙڻ جي سازش آھي. اياز لطيف پليجو

پليجي پاران خالد مقبول صديقي جي ڪراچي کي وفاق حوالي ڪرڻ ۽ سنڌ کي ٽوڙي نئون صوبو ٺاهڻ واري بيان جي سخت لفظن ۾ مذمت

حيدرآباد: قومي عوامي تحريڪ جي سربراھ اياز لطيف پليجي ايم ڪيو ايم جي اڳواڻ ۽ وفاقي وزير خالد مقبول صديقي جي ڪراچي کي وفاق حوالي ڪرڻ ۽ سنڌ کي ٽوڙي نئون صوبو ٺاهڻ واري بيان جي سخت لفظن ۾ مذمت ڪندي چيو آهي تہ ڪراچي سنڌ جي دل آهي. سنڌ کي ورھائڻ جي ڳالھ پاڪسٿان کي ٽوڙڻ جي سازش آھي. عالمي سامراجي طاقتون پاڪستان کي ٽوڙي نئون اسرائيل بنائڻ چاھين ٿيون. جيڪو بہ نئين صوبي جي ڳالھ ڪري ٿو اھو انھي سازش جو حصو آھي. اياز لطيف پليجي چيو تہ شھباز شريف، آصف علي زرداري ۽ سنڌ حڪومت سنڌ ٽوڙڻ جا مطالبا ڪندڙ ايم ڪيو ايم جا سھولتڪار نہ بڻجڻ سنڌ ٽوڙڻ جي مطالبو ڪندڙ خالد مقبول صديقي تي آرٽيڪل 6 تحت ڪيس داخل ڪيو وڃي ۽ ايم ڪيو ايم کي فوري طور وفاقي حڪومت کان ڌار ڪيو وڃي.اياز لطيف پليجي چيو تہ اصل شئي قوم ۽ وطن آهي ھزارين سالن کان سنڌ سنڌين جو تاريخي وطن آهي اسان کي سڀني انسانن سان پيار آھي پر اسان کي پنھنجي وطن سان سڀني کان وڌيڪ پيار آھي. سنڌ اسان جي آھي. سنڌ جي وحدت تي ڪو بہ وار برداشت نہ ڪنداسين.اياز لطيف پليجي چيو تہ ايم ڪيو ايم ميل گھوڙو آھي، اسٽيبلشمينٽ جي مھري کان وڌيڪ انھن جي ڪا حيثيت ناھي. اردو ڳالھائيندڙ سنڌ جو حصو آھي. اھي نفرت ۽ تعصب جي سياست کي رد ڪن ٿا. ايم ڪيو ايم اقتدار جي عروج تي پھچڻ باوجود ڏوھن، منشيات، ميرٽ جي تباھي ۽ ڪرپشن کانسواءِ ڪجھ ناھي ڏنو.اياز لطيف پليجي چيو تہ سنڌ پاڪستان جي خليقڪيندڙ آھي. پنج ھزار سال پراڻي تھذيب رکندڙ سنڌ فتح ڪيل علائقو ناھي، سنڌ سنڌين جو وطن آھي. امن، محبت، رواداري اسان جي تھذيب جو حصو آھن. ملڪ کي ٽڪراءَ ۽ انتشار واريون پاليسيون تباھي کانسواءِ ڪجھ بہ نٿيون ڏئي سگھن. ان ڪري ايم ڪيو ايم کي سامھون آڻي سنڌ دشمن ايجنڊا سازش جوڙيندڙ ٻڌي ڇڏين تہ صوبي جي نالي ۾ سنڌ کي ٽوڙڻ نه ڏينداسين. سنڌ ھڪ آھي، ھڪ رھندي. سنڌ آھي تہ پاڪستان آھي. اياز لطيف پليجي چيو تہ وفاقي حڪومت ھوش کان ڪم وٺي. جيڪڏھن 27 ھين ترميم ۾ سنڌ دشمن شق کي شامل ڪيو ويو تہ 7 ڪروڙ سنڌ جا ماڻھو رستن تي ايندا. انڪري ملڪ کي وڌيڪ بحران ۾ وجھڻ کان. باز اچو. ايم ڪيو ايم جا ھٿ معصوم ماڻھن جي خون ۾ رنگيل آھن. ملڪ دشمن ۽ سنڌ دشمن سازشن کي بند ڪيو وڃي. پيپلز پارٽي ڀلي سنڌ ٽوڙڻ وارين سازشن تي خاموش ھجي پر سنڌ جي ماڻھن کي اقتدار کان وڌيڪ پنھنجو وطن عزيز آھي. اھڙو ڪو بہ دستور ھلڻ نہ ڏنو ويندو جيڪو سنڌ دشمن ۽ ملڪ دشمن پسمنظر ۾ ھجي.