عوامي پريس ڪلب ملير ۽ ڪي يو جي ورڪرز جو شهيد صحافي امتياز مير جي وارثن سان تعزيت جو اظهار

عوامي پريس ڪلب ۽ ڪي يو جي ورڪرز جي گڏيل وفد شهيد صحافي ۽ اينڪر پرسن امتياز مير جي تڏي تي پهچي تعزيت ڪئي

ملير (رپورٽ: عبدالرشيد مورجھريو) عوامي پريس ڪلب ملير ۽ ڪراچي يونين آف جرنلسٽس (ڪي يو جي) ورڪرز جي گڏيل وفد شهيد صحافي ۽ اينڪر پرسن امتياز مير جي تڏي تي پهچي وارثن سان ملاقات ڪري تعزيت ۽ ڏک جو اظهار ڪيو وفد ۾ ڪي يو جي جو اڳواڻ سامي ميمڻ، عوامي پريس ڪلب ملير جا سينيئر صحافي طارق سهتو، اصغر ميمڻ، نادر وسير ۽ ٻيا صحافي شامل هئا. وفد مرحوم جي ڀائرن، ڀائيٽن ۽ ٻين وارثن سان مليو ۽ چيو ته امتياز مير جي شهادت رڳو صحافتي برادري لاءِ نه پر سموري سماج لاءِ هڪ وڏو نقصان آهي وفد جي ميمبرن چيو ته امتياز مير پنهنجي پوري پيشورانه زندگيءَ ۾ هميشه سچائي ۽ عوامي مسئلن کي اجاگر ڪرڻ کي ترجيح ڏني ۽ هو پنهنجي جان جي بازي لڳائي به صحافتي اصولن تي قائم رهيو. هنن حڪومت سنڌ ۽ قانون لاڳو ڪندڙ ادارن کان مطالبو ڪيو ته صحافين جي جان ۽ عزت جي حفاظت يقيني بڻائي وڃي ۽ امتياز مير جي قاتلن کي فوري طور گرفتار ڪري سخت سزا ڏني وڃي، جيئن اهڙين واقعن کي روڪي سگهجي.ان موقعي تي مرحوم جي اهل خانہ وفد جو شڪريو ادا ڪندي چيو ته امتياز مير جي قرباني کي هميشه ياد رکيو ويندو. هنن حڪومت کان مطالبو ڪيو ته شهيد صحافي جي خاندان جي مالي ۽ اخلاقي سهائتا ڪئي وڃي ۽ قتل جي ڪيس کي فوري طور تي منطقي انجام تائين پهچايو وڃي.